އުސޫލާ ހިލާފަށް އުމްރާއަށް ގެންދާ ނަމަ ފިޔަވަޅު އަޅާނަން: އިސްލާމިކް މިިނިސްޓްރީ
އުސޫލްތަކާ ހިލާފަށް ހުއްދަ ނުނަގާ އުމްރާއަށް މީހުން ގެންދާ ފަރާތްތަކާއިމެދު ހަމަޖެހިފައިވާ އުސޫލުން ފިޔަވަޅު އަޅާނޭކަމުގެ އިންޒާރު އިސްލާމިކް މިނިސްޓްރީން ދީފިއެވެ.
އިސްލާމިން މިނިސްޓްރީން މިއަދު އާއްމުކޮށްފައިވާ ބަޔާނެއްގައި ބުނެފައިވަނީ، ބައެއް ކުންފުނިތަކުން ވިޔަފާރީގެ އުސޫލުން ހުއްދަ ނުހޯދައި މީހުން އުމްރާއަށް ގެންދާކަމަށެވެ.
އިސްލާމިކް މިނިސްޓްރީގެ ހުއްދަ ލިބިގެން ނޫންގޮތަކަށް ވިޔަފާރީގެ އުސޫލުން އެއްވެސް ކުންފުންޏަކަށް މީހުން އުމްރާއަށް ގެންދިއުމަކީ މަނާކަމެކެވެ. އިސްލާމިކް މިނިސްޓްރީން ބުނީ އުސޫލުގެ ދަށުން ވިޔަފާރި ކުންފުނިތަކަށް އުމްރާއަށް މީހުން ގެންދިއުމަށް ލިބޭނީ ދެ އަހަރުގެ މުއްދަތެއް ކަމަށާއި، ހުއްދައިގެ މުއްދަތުގެ ތެރެއަށް ނުވަންނަ އުމްރާ ދަތުރުތަކަށް މީހުން އަތުން އެޑްވާންސްކޮށް ފައިސާ ނެގުމަކީ ކަނޑައެޅިފައިވާ އުސޫލްތަކާއި ހިލާފް ކަމެއްކަމަށެވެ.
އުމްރާއަށް މީހުން ގެންދިއުމުގެ ހުއްދަ ނެތް ކުންފުންޏަކަށް އެއްވެސް ފަރާތަކުން އުމުރާގެ އަޅުކަމަށް ފައިސާ ނުދެއްކުމަށް އިސްލާމިކް މިނިސްޓްރީން ވަނީ އާއްމުނަށް އިލްތިމާސްކޮށްފައެވެ. އިސްލާމިކް މިނިސްޓްރީގެ އުސޫލްތަކާއި ހިލާފަށް އެއްވެސް ފަރާތަކުން އަމަލުކޮށްފިނަމަ އެކަމުގެ ޒިންމާ ނަގަންޖެހޭނީ އެ ބަޔަކު ކަމަށްވެސް އިސްލާމިކް މިނިސްޓްރީން ބުނެއެވެ.
އުމްރާއަށް މީހުން ގެންދިއުމުގެ ހުއްދަ އޮތް ކުންފުނިތަކުގެ ލިސްޓް އިސްލާމިކް މިނިސްޓްރީގެ ވެބްސައިޓުން ފެންނަން ހުންނާނޭކަ މަށްވެސް އެ މިނިސްޓްރީން ބުނެއެވެ.
މިލިޔުން ކިޔާލުމުން
