ރައީސް ވަހީދާއި ޝައިނީ ޖޭޕީއަށް ސޮއި ކުރައްވައިފި
ކުރީގެ ރައީސުލްޖުމްހޫރިއްޔާ ޑރ. މުހައްމަދު ވަހީދާއި ކުރީގެ ފިޝަރީޒް މިނިސްޓަރު ޑރ. މުހައްމަދު ޝައިނީ ޖުމްހޫރީ ޕާޓީ (ޖޭޕީ)އަށް ސޮއި ކުރައްވައިފި އެވެ.
ރައީސް ވަހީދާއި ޝައިނީ ޖޭޕީއަށް ސޮއި ކުރެއްވީ ޖޭޕީގެ ލީޑަރު ގާސިމް އިބްރާހީމްގެ ރަށް އދ. މާމިގިލީގައި މިރޭ ބޭއްވި ޖޭޕީގެ ޖަލްސާއެއްގަ އެވެ.
ރައީސް ވަހީދާއި ޑރ. ޝައިނީގެ މެންބަޝިޕް ފޯމާ ހަވާލުވެވަޑައިގަތީ ވެސް ގާސިމް އެވެ.
ރައީސް ވަހީދު ޖޭޕީއަށް ސޮއިކުރައްވާފައި މިވަނީ މިމަހުގެ 10 ވަނަ ދުވަހު ޕީޕީއެމް އިން ވަކިވެވަޑައިގަތުމަށްފަހު އެވެ.
ޕީޕީއެމް އިން ވަކިވެވަޑައިގެންނެވި މައިގަނޑު ސަބަބެއްގެ ގޮތުގައި ރައީސް ވަހީދު ވިދާޅުވީ އެމަނިކުފާނަށް ލިބިފައިވާ އިލްމާއި ތަޖުރިބާގެ ބޭނުން ހިފައިގެން ރައްޔިތުންނަށް ކަމެއް ކޮށްދިނުން ކަމަށެވެ. އެކަންކަން ކޮށްދިނުމަށް ބޭނުންވާ އަމާން، އިހުލާސްތެރި އަދި ތެދުވެރި މާހައުލު ޕީޕީއެމްގެ ތެރޭގައި އޮތް ކަމަކަށް ވަހީދު ގަބޫލެއް ނުކުރައްވަ އެވެ.
