އެއް ކެނޑިޑޭޓަކު ނެރެން ޖޭޕީ، އެމްއެންޕީ އަދި ޑިމޮކްރެޓްސްއިން އެއްބަސްވެއްޖެ

ރިޔާސީ އިންތިޚާބުގައި ޖޭޕީ، އެމްއެންޕީ އަދި ޑިމޮކްރެޓްސްއިން ގުޅިގެން އެއް ކެނޑިޑޭޓަކު ނެރުމަށް އެއްބަސްވެއްޖެއެވެ.

މި 3 ޕާޓީން މިކަން އިއުލާންކުރީ މިއަދު ޖުމްހޫރީ ޕާޓީގެ އޮފީހުގައި ބޭއްވި މަޝްވަރާ ބައްދަލުވުމަކަށްފަހުއެވެ.

އިޝްތިހާރު

ކުނޫޒްގައި ބޭއްވި ބައްދަލުވުމުގައި ޕާޓީތަކުގެ ފަރާތުން އިސްކޮށް ބައިވެރިވެވަޑައިގެންނެވީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްއާއި، އެމްއެންޕީގެ ރައީސް ކާނަލް ނާޒިމްއާއި، ދަ ދިމޮކްރެޓްސްގެ ފަރާތުން ކުރީގެ ރައީސް މުހައްމަދު ނަޝީދުއެވެ.

މަޝްވަރާތަކަށްފަހު ނޫސްވެރިންނަށް މަޢުލޫމާތު ދެއްވަމުން ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވީ ކުރިއަށް އޮތް ރިޔާސީ އިންތިހާބުގައި ގުޅިގެން އެއް ކެނޑިޑޭޓަކު ނެރުމަށް އެއްބަސް ވެވިފައިވާކަމަށެވެ.

އަދި ކުރިއަށް އޮތް ތަނުގައި އިދިކޮޅު އެންމެ ބޮޑު ސިޔާސީ ޕާޓީ، ޕީޕީއެމްގެ އިތުރުން އެމްއާރުއެމްއާ އެކަމާ ބެހޭގޮތުން މަޝްވަރާ ކުރައްވާނެ ކަމަށް ވިދާޅުވި އެވެ.