ޚަބަރު ފީތާ

އިންޑިއާގެ ޒޫއެއްގައި ޖަނަވާރުންގެ މެދުގައި ސާސް ކޯވިޑް-2 ފެތުރެނީ

އިންޑިއާގެ ޗެންނާއީގެ ޒޫއެއްގައި ޖަނަވާރުންގެ މެދުގައި ސާސް ކޯވިޑް-2 ފެތުރެން ފަށައިފި އެވެ.

ޗެންނާއީގެ އަރިގްނާރް އަންނާ ޒޫލޮޖިކަލް ޕާކުގައި ބަލަހައްޓަމުންދާ ޖަނަވާރުންތަކުގެ ތެރެއިން އަދި ބަލި ފެނިފައިވަނީ ސިންގާތަކެއްގެ ގައިންނެވެ. ފުރަތަމަ ބައްޔަށް ޕޮސިޓިވްވެގެން މަރުވެފައިވަނީ އުމުރުން ނުވަ އަހަރުގެ ސިންގާއެކެވެ.

އެ ޒޫ ބަލަހައްޓާ ފަރާތްތަކުން ބުނެފައިވަނީ ސާސް ކޯވިޑް-2 ޖެހިގެން ފުރަތަމަ މަރުވި ސިންގާ މަރުވުމުގެ ކުރިން ބަލީގެ އަލާމާތެއްގެ ގޮތުގައި ނޭފަތުން ރޯގާ ފޭބި ކަމަށެވެ. އޭތި މަރުވުމާއި ގުޅިގެން އެކުގައި އުޅުނު އިތުރު އަށް 11 ސިންގާގެ ސާމްޕަލް ޓެސްޓު ކުރި އެ ބައްޔަށް ޕޮސިޓިވްވެފައިވާ ކަމަށެވެ.

ޒޫ ބަލަހައްޓާ ފަރާތުން ބުނީ އެ 11 ސިންގާ ބައްޔަށް ޓެސްޓު ކުރަން ނިންމީ އޭގެ ތެރެއިން ފަސް ސިންގާ ކެއުން ހުއްޓާލައި، ކެއްސާތީ ކަމަށެވެ. ބައްޔަށް ޕޮސިޓިވްވި ސިންގާތަކަށް މިހާރު އެކަހެރި ކޮށްގެން ފަރުވާ ދޭން ފަށާފައިވާ ކަމަށް ބުނެ އެވެ.

އެ ޒޫ އިން ސާސް ކޯވިޑް-2 ފެނުމާއި ގުޅިގެން ޒޫ ބަލަހައްޓާ ފަރާތުން ވަނީ އެތަނުގައި ބަލަހައްޓާ ހުރިހާ މިނިކާވަގާއި ސިންގާތައް ކޯވިޑަށް ޓެސްޓު ކުރަން ނިންމާފައި އެވެ. އަދި ބަލީގައި މަރުވި ސިންގާގެ ސާމްޕަލް އިތުރަށް ޔަގީން ކުރުމަށް އަލުން ޓެސްޓު ކުރުމަށް ވަނީ ނިންމާފައި އެވެ.

މިދިޔަ މަހު ކުރީކޮޅު އިންޑިއާގެ ހައިދަރްއާބާދުގެ ޒޫއެއްގައި ބަލަހައްޓަމުން ދިޔަ ސިންގާތަކަކަށް މި ބަލި ޖެހިފައިވެ އެވެ.

ސާސް ކޯވިޑް-2 އަކީ މިހާރު ފެތުރެމުންދާ ކޯވިޑް-19 ހެން ނޭވާލާ ނިޒާމަށް ޖެހޭ ބައްޔެކެވެ.

Like
Like Love Haha Wow Sad Angry