ކޮވިޑް 19 އާއިއެކު ”ކަޅު ފަންގަސް“ ފެތުރުން އިންޑިޔާގައި އިތުރު ވެއްޖެ

ފަރުވާކުރަން އުނދަގޫ ހަމުގެ ފަންގަސްއެއް ކަމަށްވާ ’މިއުކޯމައިކޯސިސް‘ (ކަޅު ފަންގަސް) ފެތުރުން އިތުރުވެފައިވާ ކަމަށް އިންޑިޔާގެ ސިއްޙީ ރެކޯޑުތަކުން ދައްކައިފިއެވެ. ޑޮކްޓަރުން ބުނާގޮތުގައި، ކޮވިޑްގެ ބާރުގަދަ ރާޅާއެކު މިއުކޯމައިކޯސިސް ފެތުރެން ފަށާފައި ވަނީ ކޮވިޑަށް ފަރުވާ ކުރަމުންދާ، ނުވަތަ ކޮވިޑްޖެހި ފަސޭހަ ވެފައިވާ މީހުންނަށެވެ.

މިއުކޯމައިކޯސިސްގެ ޝިކާރައަކަށް ވެފައިވާ މުމްބައިގެ ތާނޭ ޑިސްޓްރިކްޓްގައި ދިރިއުޅެމުންދާ މެކަނިކަލް އެންޖިނިއަރެއް ކަމަށްވާ 35 އަހަރުގެ މިލިންދް ދޭޝްމުކް ބުނެފައިވަނީ، ކޮވިޑް 19 ވެފައިވަނީ އޭނާގެ ޙަޔާތް ބަދަލުކޮށްލި ހިތި ތަޖުރިބާއަކަށް ކަމަށެވެ. ސަބަބަކީ ކޮވިޑް 19 އަށް ފަރުވާ ކުރަނިކޮށް އޭނާގެ ހަންގަނޑުގައި މިއުކޯމައިކޯސިސް ފެތުރެން ފެށުމުންނެވެ.

އިޝްތިހާރު

އަދި މި ފަންގަސް ފެތުރެން ފެށިތާ މަހެއްހާ ދުވަސް ތެރޭގައި، އޭނާގެ މޫނުމަތީގެ ބޮޑުބަކަޔަށް ފެތުރި، ކަނާތު ލޮލާއި އަނގައިގެ ތައްޔަށްވެސް ފެތުރި ހަމުގެ ޓިޝޫތައް ވަނީ ކާލައިފައިވެއެވެ. ދޭޝްމުކްގެ ބޭބެ މަކަރަންދް އަލް ޖަޒީރާއަށް ދިން އިންޓަވިއުއެއްގައި ބުނެފައި ވަނީ، މިއީ ވަރަށްވެސް ހިތާމަވެރި ކަމެއް ކަމަށާއި، މިކަމުގެ ސަބަބުން މިހާތަނަށް މޫނުމަތީގެ 3 އޮޕަރޭޝަން ކޮށްފައިވާ ކަމަށެވެ. އަދި އޭގެ ސަބަބުން އޭނާގެ ކަނާތު ލޮލުގެ ފެނުން ގެއްލި، އަނގައިގެ ތަލި ނަގަން ޖެހުމުން ވާހަކަ ދެއްކުމަށާއި ކެއުމަށް ވެސް ދަތިވާނެ ކަމަށް ބުނެފައިވެއެވެ.

ފަރުވާ ކުރަން އުނދަގޫ މި ފަންގަލް އިންފެކްޝަން ފެތުރުން ކުރިއަށްވުރެ އެތައް ގުނައެއް އިތުރުވެފައިވާކަން ޑޮކްޓަރުން ފާހަގަ ކޮށްފައިވަނީ، އިންޑިޔާގައި ކޮވިޑް 19 ފެތުރުން އިތުރުވާން ފެށުމުންނެވެ. މީގެ ކުރިން މިއުކޯމައިކޯސިސްގެ ބައެއް ކޭސްތައް ފެނިފައިވި ނަމަވެސް، މިފަހަރު މި އިންފެކްޝަން ފެތުރެމުންދަނީ ކޮވިޑް ޖެހިފައިވާ ނުވަތަ ކޮވިޑަށް ފަރުވާ ކޮށްފައިވާ މީހުންގެ މެދުގައެވެ. އަދި މިފަހަރު އިންފެކްޝަން ފެތުރެމުންދާ މިންވަރު ކުރިއަށްވުރެ އެތައް ގުނައެއް މަތި ކަމަށްވެސް ޑޮކްޓަރުން ދަނީ ބުނަމުންނެވެ.

މުމްބާއިގެ ގްލޯބަލް ހޮސްޕިޓަލްގައި މަސައްކަތް ކުރައްވާ ކަރުން މަތީގެ ޑޮކްޓަރެއް ކަމަށްވާ ޑޮކްޓަރ މިލިންދް ނަވަލާކޭ ބުނެފައިވަނީ، މިއީ ނުރައްކާތެރި ހާލަތެއް ކަމަށެވެ. އޭނާގެ 25 އަހަރުގެ ޚިދުމަތުގައި، ކުރިން މި އިންފެކްޝަން ޖެހިގެން ހަފްތާއަކު އެކަކު އައިސްފައިވާއިރު މިހާރު ހަފްތާއަކު 25 އަށް ވުރެ ގިނަ މީހުންނަށް މި އިންފެކްޝަން ޖެހިގެން އަންނަ ކަމަށާއި، އެއީ ހުސް ކޮވިޑްއަށް ފަރުވާ ކުރާ ނުވަތަ ކޮށްފައިވާ މީހުން ކަމަށް ވެސް އޭނާ ބުނެފައިވެއެވެ.

މަހަރާޝްތުރަ ސްޓޭޓްގައި މިހާތަނަށް މިއުކޯމައިކޯސިސްގެ 2000 އެއްހާ ކޭސް ރެކޯޑް ކޮށްފައިވާއިރު، މި އިންފެކްޝަންގެ ސަބަބުން 8 މީހަކު މަރުވެފައިވާ ކަމަށްވެސް ރިކޯޑުތަކުން ދައްކައެވެ. އަދި މި އިންފެކްޝަން ޖެހިފައިވާ މީހުންނަށް ފަރުވާ ކުރުމަށް ހާއްސަ ވޯޑެއް ހޮސްޕިޓަލްތަކުގައި ޤާއިމް ކުރުމަށް ވެސް އެ ސްޓޭޓްގެ ސިއްޙަތާއި ބެހޭ ވަޒީރު ރާޖޭޝް ތޯޕޭ ވަނީ އަންގާފައެވެ.

މިއުކޯމައިކޯސިސް، ނުވަތަ ކަޅު ފަންގަސް ޖެހެނީ މިއުކޯމައިސީޓްސް ނަމަކަށް ކިޔާ ފަންގަސްއެއްގެ ސަބަބުންނެވެ. ސެންޓަރ ފޯ ޑިސީސް ކޮންޓްރޯލް އެންޑް ޕްރިވެންޝަންއިން ބުނެފައިވާ ގޮތުގައި، މިއީ ވެއްޔާއި ފީވަމުންދާ ލަކުޑި، ފަތް އަދި ކުނި ފަދަ ތަކެތީގައި ދިރިއުޅޭ ފަންގަސްއެކެވެ.

މި އިންފެކްޝަން ޖެހެނީ، ނޭވާލުމުން ވަޔާއިއެކު މި ފަންގަސް ހަށިގަނޑަށް ވަދެގެންނެވެ. އަދި ބައްޔެއްގެ ސަބަބުން ނުވަތަ ދާއިމީ ގޮތަކަށް ބޭސް ކާން ޖެހިފައި ވުމުން، ހަށިގަނޑުގެ ދިފާއީ ބާރު ދަށްވެފައިވާ މީހުންނަށް މި އިންފެކްޝަން ފެތުރުން ގާތް ކަމަށް ސިއްޙީ މާހިރުން ބުނެފައިވެއެވެ. ކޮވިޑް 19 ޖެހިފައިވާ މީހުންގެ ދިފާއީ ބާރު ދަށްވެފައި ވުމުން، އަދި އޭގެތެރެއިން ގިނަ މީހުން ބަލިން ރަނގަޅު ވުމަށް ބޭސް ބޭނުން ކުރަން ޖެހިފައި ވުމުން އެމީހުންނަށް މިއުކޯމައިކޯސިސް އިންފެކްޝަން ފަސޭހައިން ޖެހޭ ކަމަށް ސިއްޙީ މާހިރުން ބުނެއެވެ.