ބަންގްލަދޭޝް އިތުރު ހަފުތާއަކަށް ފުރަބަންދު ކޮށްފި
ކޯވިޑް-19އިގެ ބަލިމަޑުކަން އިތުރުވަމުންދާތީ، ބަންގްލަދޭޝްގައި އިޢުލާނުކޮށްފައިވާ ފުރަބަންދުގެ މުއްދަތު އެއްހަފުތާއަށް އިތުރުކޮށްފިއެވެ.
އެގައުމުގެ ސަރުކާރުން ހާމަކޮށްފައިވާ ގޮތުގައި ބަންގްލަދޭޝުގެ ސަރުކާރުން ބުނީ އޭޕުރިލް މަހުގެ 22 ވަނަ ދުވަހުން ފެށިގެން އިތުރު އެއްހަފުތާއަށް ފުރަބަންދުގެ އުޞޫލުތައް ދެމެހެއްޓުމަށް ސަރުކާރުން ނިންމާފައިވާ ކަމަށެވެ. އަދި އެގޮތަށް ނިންމީ ޤައުމުގެ ޙާލަތަށް ބެލުމަށް ފަހުކަމަށް ވެސް އެ ޤައުމުގެ ސަރުކާރުން ބުނެއެވެ.
ބަންގްލަދޭޝުގައި މިހާތަނަށް 723،311 މީހުންނަށް ކޯވިޑް-19 ޖެހިފައިވާ އިރު، 10،500 މީހުންވަނީ މަރުވެފަ އެވެ.
އެގައުމުގައި ކޯވިޑް-19 ފެތުރޭ މިންވަރު އިތުރުވުމުން 9 ދުވަހުގެ މުއްދަތަކަށް އެ ޤައުމު ދެވަނަ ފަހަރަށް ފުރަބަންދު ކުރީ އޭޕްރިލް މަހުގެ 5 ވަނަ ދުވަހު އެވެ. އެއާއެކު ހުރިހާ އިދާރާތަކާއި ވިޔަފާރި މަރުކަޒުތައް ބަންދުކޮށް ދަތުރުފަތުރު ކުރުން ވެސް ވަނީ ހުއްޓާލާފައެވެ.
އެކަމަކުވެސް އިތުރަށް ފުރަބަންދު ކުރަން ނިންމީ އޭޕުރިލް މަހުގެ 9 ވަނަ ދުވަހު އެ ޤައުމުގައި ރެކޯޑު ޢަދަދެއްގެ މީހުންނަށް ބަލިޖެހުމުން ނެވެ.
160 މިލިއަން މީހުންގެ އާބާދީއެއް އޮންނަ ބަންގްލަދޭޝްގެ ޞިއްޙީ ނިޒާމަށް، ކޮވިޑު ބަލީގެ ސަބަބުން ވަނީ ވަރަށް ބޮޑަށް ބާރުބޮޑުވެފައެވެ. ޞިއްޙީ ނިޒާމަށް އޮތް ބުރަ ލުއިކުރުމުގެ ގޮތުން އެ ޤައުމުގައި 1،000 އެނދުގެ ހަސްފަތާލެއް ޤާއިމުކޮށް މިދިޔަ ހަފުތާގެ ތެރޭގައި ހުޅުވާފައި ވެއެވެ.
މިލިޔުން ކިޔާލުމުން
