
މިސަރުކާރު އޮތްހާ ހިނދަކު ތަކެތީގެ އަގުތައް ދާނީ މައްޗަށް – ވީ.ޕީ ފައިޞަލް ނަޞީމު
ފައިޞަލް ނަސީމް އެކްސް ގައި ލިޔުއްވާފައިވަނީ އަސާސީ ކާބޯތަކެތީގެ ލިސްޓު ދިގުކުރެވިދާނެ ކަމަށާ ނަމަވެސް ބާޒާރުގައި އެ ތަކެތީގެ އަގު އަތް ނުފޯރާ ފަށަށް އުފުލިގެން ދިޔަ ނުދިނުމަށް އަޅަންޖެހޭ ފިޔަވަޅުތައް އެޅުމުގައި ސަރުކާރު މި ދަނީ ފެއިލްވަމުން ކަމަށެވެ.
”ޑޮލަރެއް ނުލިބޭ، އަދި ވިޔަފާރިތަކަށް ޓީޓީއެއް ނުހެދޭ. އެކަމުގެ ނަތީޖާ އަކީ ސަޕްލައި ދަށްވެ، ތަކެތީގެ އަގު އިންތިހާއަށް މައްޗަށް ދިޔުން. – ފައިޞަލް ނަސީމް
މީގެ އިތުރުން ފައިޞަލް ފާހަގަކުރެއްވީ އިއްޔެއާ ހަމައަށް ކެރެޓު ކިލޯއެއްގެ އަގު ހުރީ 170ރ. ކަމަށާއި މިދިޔަ އަހަރުގެ އޮކްޓޫބަރު މަހާ އަޅާބަލާއިރު މި އަހަރުގެ އޮކްޓޫބަރު މަހު އެއްގަމު މަހުގެ ބާވަތްތަކުގެ އަގު %23.97 މައްޗަށް ގޮސްފައިވާއިރު، ތަރުކާރީގެ އަގު ވަނީ %22.16 މައްޗަށް ގޮސްފަ ކަމަށެވެ.
”މިއަދުގެ ޙަގީގަތަކީ މިސަރުކާރު އޮތްހާ ހިނދަކު ތަކެތީގެ އަގުތައް އުފުލުމަށް ހުއްޓުމެއް ނާންނާނެކަން. އަގު ތިރިކުރަން މި ސަރުކާރުން ނިންމި އެއްވެސް ސިޔާސަތަކުން ރަނގަޅު ނަތީޖާއެއް މިހާތަނަށް ފެނިފައި ނުވޭ“ -ފައިޞަލް ނަސީމް



