ގެވެށި އަނިޔާ ހުއްޓުވުމަށް ފުލުހުން ތަމްރީނުކުރުމަށް ޕްރޮގްރާމެއް ކުރިއަށް ގެންގޮސްފި

ގެވެށި އަނިޔާ ހުއްޓުވުމާއި އެފަދަ މައްސަލަތަކަށް އިޖާބަދިނުމުގެ ގާބިލުކަން އިތުރުކުރުމުގެ މަގުސަދުގައި ފުލުހުންނަށް ހާއްސަކޮށްގެން ބޭއްވި ޓްރެއިނިންގ އޮފް ޓްރޭއިނާސް އޮން ޑޮމެސްޓިކް ވައިލެންސް ޕްރިވެންޝަން އެންޑް ރެސްޕޮންސް -“ޓީއޯޓީ” ޕްރޮގްރާމް ކުރިއަށް ގެންގޮސްފިއެވެ.

މި ޕްރޮގްރާމަކީ ދިވެހި ފުލުހުންގެ ޚިދުމަތާއި، ފެމިލީ ޕްރޮޓެކްޝަން އޮތޯރިޓީ (އެފްޕީއޭ) ގުޅިގެން، މި ސެޕްޓެމްބަރު މަހުގެ 20 އިން 24 އަށް ކުރިއަށް ގެންދިޔަ ޕްރޮގްރާމެކެވެ. ރާއްޖޭގެ އެކި ސަރަހައްދުތަކުގައި މަސައްކަތްކުރާ ފުލުހުން ހިމެނޭހެން ޖުމުލަ 30 ފުލުހުން ބައިވެރިވި މި ޕްރޮގްރާމުގައި، ގެވެށި އަނިޔާއާ ގުޅޭ މުހިންމު ދާއިރާތަކަށް އަލިއަޅުވާލައި 10 ސެޝަނެއް ވަނީ ކުރިއަށް ގެންގޮސްފައެވެ.

އިޝްތިހާރު

މި ތަމްރީނު ޕްރޮގްރާމް ހިންގުމުގެ މައިގަނޑު މަގުސަދަކީ ގެވެށި އަނިޔާ ހުއްޓުވުމަށާއި، އެފަދަ މައްސަލަތައް ރިޕޯޓުކުރުމުން ފުލުހުން އަމަލުކުރަންޖެހޭ ގޮތްތަކާ ގުޅޭގޮތުން ބޭނުންވާ އިލްމާއި ހުނަރު އިތުރުކުރުމެވެ. މީގެ އިތުރުން، ފުލުހުންގެ މުއައްސަސާގެ ތެރޭގައި އެހެން ފުލުހުންނަށް މިފަދަ ތަމްރީނުތައް ދެވޭނެ ފެންވަރުގެ ގާބިލު މުދައްރިބުން (ޓްރެއިނަރުން) އުފެއްދުމާއި، މި ދާއިރާއިން ފުލުހުން ދޭ ހިދުމަތުގެ ފެންވަރު އިތުރަށް ހަރުދަނާކުރުމަކީ ވެސް މި ޕްރޮގްރާމުގެ މުހިންމު އަމާޒެކެވެ.

މި ޕްރޮގްރާމް ނިންމައިލާފައިވަނީ ބައިވެރިންނަށް އުނގަންނައިދެވުނު މައުލޫމާތާއި، މުދައްރިބެއްގެ ކިބައިގައި ހުންނަންޖެހޭ ކިޔަވައިދިނުމުގެ ހުނަރުތައް ހުރި މިންވަރު ދެނެގަތުމަށްޓަކައި ހާއްސަ އިމްތިހާނެއް ހެދުމަށްފަހުގައެވެ. މިގޮތުން ބައިވެރިންގެ ފެންވަރު ވަޒަންކުރުމަށް އެމް.ސީ.ކިއު އިމްތިހާނެއް ބޭއްވުމުގެ އިތުރުން، ބައިވެރިން އަމަލީގޮތުން ކިޔަވައިދިނުމުގެ ހުނަރު ދައްކުވައިދޭ ޕްރެޒެންޓޭޝަންތަކެއް ވެސް ވަނީ ހުށަހަޅާފައެވެ.