”ރިކަވަރީ އިޒް ޕޮސިބަލް“

މީގެ ހަތަރު އަހަރު ކުރިން، ޑެނީ އެލަރޑް އަކީ މަގުމަތިވެފައިވާ، ހަށިގަނޑު ނުހަނު ބަލިކަށި، އަދި ގާތްގަނޑަކަށް 20 އަހަރު ވަންދެން މަސްތުވާތަކެތީގެ ވަބާގައި ތަޅުލެވިފައިވި މީހެކެވެ.

އެއް ދުވަހަކު، އޮކްލަހޯމާ ސިޓީގެ ބްރިޖެއްގެ ދަށުގައި އޭނާ ހުއްޓާ ފުލުހުންނަށް ފެނުނެވެ. އެވަގުތު އޭނާގެ މައްޗަށް ޖިނާއީ ކުށްތަކެއްގެ މައްސަލައިގައި ހައްޔަރުކުރުމުގެ ޢަމުރު ނެރެފައި އޮތް ނަމަވެސް، ފުލުހުން އޭނާ ޖަލަށް ގެންދިއުމުގެ ބަދަލުގައި އަވަސްވެގަތީ ހޮސްޕިޓަލަށް ގެންދިއުމަށެވެ.

އިޝްތިހާރު

އެއިރު އޭނާގެ ބަރުދަނުގައި ހުރީ އެންމެ 42 ކިލޯއެވެ. އަދި މަސްތުވާތަކެތި ބޭނުންކުރުމުގެ ސަބަބުން އޭނާގެ ހަށިގަނޑުގައި ނުރައްކާތެރި އިންފެކްޝަނެއް އުފެދިފައިވެ އެވެ.

އޭނާ ދިރިއުޅެމުން ދިޔައީ އޮކްލަހޯމާ ސިޓީގެ ފަޅު ގޭގެއާއި ފޭލިގެތަކުގަ އެވެ.

އޭގެ ފަހުން އޭނާގެ ދިރިއުޅުން ބަދަލުވާން ފެށިއެވެ. ’ހޯޕް އިޒް އެލައިވް މިނިސްޓްރީޒް‘ މެދުވެރިކޮށް އޭނާ ފަރުވާ ހޯދައި، މަސްތުވާތަކެއްޗާ ދުރުވެ، އަލުން ކިޔަވަން ފެށިއެވެ.

އޮކްލަހޯމާ ސްޓޭޓް ޔުނިވަރސިޓީ-އޮކްލަހޯމާ ސިޓީގައި ކޮމްޕިއުޓަރ އިންފޮމޭޝަން ސިސްޓަމްސްގެ ދާއިރާއިން އޭނާ ތަޢުލީމު ޙާޞިލުކުރި އެވެ.

ކިޔަވަމުންދިޔަ ދުވަސްވަރު ޕާޓް-ޓައިމްކޮށް މަސައްކަތްކޮށް، ފަރުވާ ހޯދާ މީހުން ދިރިއުޅޭ ގެއެއް ބަލަހައްޓަމުންވެސް، އޭނާ ވަނީ ދެ އެސޯސިއޭޓް ޑިގްރީ ފުރިހަމަކޮށް، އެންމެ މަތީ ގްރޭޑް (4.0 ޖީ.ޕީ.އޭ) ހޯދާފަ އެވެ.

އޭނާގެ ތަޢުލީމީ ކާމިޔާބީއާއި މުޖުތަމައަށް ކޮށްދިން ޚިދުމަތްތަކުގެ އަގުވަޒަންކޮށް، 2025 ވަނަ އަހަރު ’ވުމަން ފޯ އޯ.އެސް.ޔޫ ސްކޮލަރ‘ ގެ ލަގަބު އޭނާއަށް ލިބުނެވެ.

ނަމަވެސް، މި ވާހަކައިގެ އެންމެ ފާހަގަކޮށްލެވޭ ބަޔަކީ އޭނާ އިޚްތިޔާރުކުރި މަސައްކަތެވެ. އެލަރޑް މިހާރު މަސައްކަތް ކުރަނީ ’ސިޓީ ކެއަރ‘ ގެ ޝެލްޓަރ އެޑްވޮކޭޓެއްގެ ގޮތުގަ އެވެ.

އޭނާ އެހީތެރިވަމުންދަނީ އެ ސިޓީއެއްގައި އެއްދުވަސްވަރެއްގައި އޭނާވެސް ތަހައްމަލުކުރި ފަދަ ހާލަތެއްގައި ތިބި ބޯހިޔާވަހިކަމެއް ނެތް މީހުންނަށެވެ. އަދި އޭނާގެ މި ދިގު ދަތުރާ ގުޅޭގޮތުން ”ރިކަވަރީ އިޒް ޕޮސިބަލް“ (އަލުން ދިރިއުޅުން އާރާސްތުކުރެވިދާނެ) ގެ ނަމުގައި ފޮތެއްވެސް ވަނީ ލިޔެފައެވެ.

މަގުމަތީގައި ޙާލުގައި ޖެހިފައި އޮތް މީހަކު، ކޮލެޖުން ދަސްވެނިވެ، އެހެން މީހުންގެ ދިރިއުޅުން ބިނާކުރުމަށް އެހީތެރިވާ މީހަކަށް ބަދަލުވެގެން ދިޔަ ދިއުމަކީ، ދިރިއުޅުން ކިތަންމެ ބޮޑަށް ބަނަވެފައި އޮތް ނަމަވެސް، އާ ފެށުމަކުން ދިރިއުޅުން އާރާސްތުކުރެވިދާނެކަމުގެ ދިރިހުރި މިސާލެކެވެ.