އުރީދޫއަކީ ކާމިޔާބު ފޮރިން ޑައިރެކްޓް އިންވެސްޓްމެންޓުގެ މިޘާލެއް: އިކޮނޮމިކް މިނިސްޓަރ

އުރީދޫ މޯލްޑިވްސްއަކީ ކާމިޔާބު ފޮރިން ޑައިރެކްޓް އިންވެސްޓްމެންޓުގެ މިޘާލެއް ކަމަށް އިކޮނޮމިކް ޑިވެލޮޕްމެންޓް މިނިސްޓަރ މުޙައްމަދު ސަޢީދު ވިދާލުވެއްޖެއެވެ.

މިނިސްޓަރ މިހެންވިދާޅުވީ އެ ކުންފުނީގެ އިކުއިޓީއިން ބައެއް، ރާއްޖެ އާއި ރާއްޖޭން ބޭރުގެ އިންވެސްޓަރުންނަށް ވިއްކުމަށް ހަމަޖެހިފައިވާތީ ސްޓޮކް އެކްސްޗޭންޖުގައި ރަޖިސްޓަރީކުރުމަށް ދަރުބާރުގޭގައި މިރޭ ބޭއްވި ޚާއްޞަ ރަސްމިއްޔާތުގައި ވާހަކަ ދައްކަވަމުންނެވެ.

އިޝްތިހާރު

މިނިސްޓަރ ވިދާޅުވީ ޓެކްނޮލޮޖީގެ އިންފްރާސްޓްރަކްޗަރ ބިނާކޮށް، އުފެއްދުންތެރި އާ ޚިދުމަތްތައް ފޯރުކޮށްދީފައިވާ އުރީދޫ އިން ރާއްޖޭގައި އިޖުތިމާޢީ، އިޤްތިޞާދީ ކުރިއެރުން ގެނެސްދިނުމަށް ކޮށްދީފައިވާ މަސައްކަތްތަކަކީ، ފޮރިން ޑައިރެކްޓް އިންވެސްޓްމަންޓްތަކުގެ ސަބަބުން ޤައުމަށާއި މުޖުތަމަޢުއަށް ލިބިދާ ފައިދާތަކަށް އަލިއަޅުވައިދޭ ކަންކަން ކަމަށެވެ.

މި ރަސްމިއްޔާތުގައި ވާހަކަ ދައްކަވަމުން އުރީދޫ ގުރޫޕުގެ ޗެއަރމަން ޝައިޚް ޢަބްދުﷲ ބިން މުޙައްމަދު ބިން ސަޢުދު އަލްޘާނީ ވިދާޅުވީ ވޭތުވެދިޔަ ހައެއްކަ އަހަރުދުވަހުގެ ތެރޭގައި އުރީދޫ މޯލްޑިވްސް ވެގެން ގޮސްފައިވަނީ އުރީދޫ ކުންފުނިތަކުގެ ތެރެއިން އެންމެ ރަނގަޅަށް ކުރިއަރަމުން އަންނަ އެއް ކުންފުނި ކަމަށެވެ.

އަދި ހުނަރުވެރި ލީޑަޝިޕް ޓީމަކާއި މުވައްޒަފުންގެ މިންނެތް މަސައްކަތުގެ ސަބަބުންނާއި އުރީދޫ ގްރޫޕްގެ އެއްބާރުލުމާއެކު، މި ކުންފުނިން ވަނީ ދުނިޔޭގެ ފެންވަރުގެ ނެޓްވަރކް ސްޕީޑާއި ޚިދުމަތްތަކެއް ދިވެހިންނަށް ފޯރުކޮށްދީފައި. ކަމަށްވެސް އޭނާ ވިދާޅުވިއެވެ.

މީގެ އިތުރުން އޭނާ ވިދާޅުވީ މިފަދަ ކާމިޔާބީތަކަށް މަގުފަހިވެފައިވަނީ ފަސޭހަކަމާއެކު ވިޔަފާރީގެ މުޢާމަލާތް ކުރުމަށް ފަހިކޮށްދޭ ހަރުދަނާ ސިޔާސަތުތަކެއް ކަނޑައެޅިފައިވުމާއެކު ޓެލެކޮމް ދާއިރާގައި ވިޔަފާރީގެ ހަރުދަނާ ޤަވާޢިދުތަކެއް އެކުލަވާލެވިފައިވާތީ ކަމަށެވެ. އުރީދޫ މޯލްޑިވްސްގެ އައި.ޕީ.އޯ ވެގެންދާނީ ރާއްޖެ އާއި ރާއްޖޭން ބޭރުގެ އިންވެސްޓަރުންނަށް ކުންފުނީގެ ކާމިޔާބީގައި ޙިއްޞާވެ، ކުރިމަގުގައި ވިޔަފާރިއަށް ލިބެމުންދާ ކުރިއެރުމުގައި ބައިވެރިވުމަށް ލިބޭ ފުރުޞަތަކަށް ކަމަށްވެސް ޝައިޚް ޢަބްދުﷲ ބިން މުޙައްމަދު ބިން ސަޢުދު އަލްޘާނީ ވިދާޅުވިއެވެ.

އުރީދޫ މޯލްޑިވްސްގެ ސީއީއޯ ވިކްރަމް ސިންގހަ ވިދާޅުވީ ދިވެހިރާއްޖޭގެ ޙިއްޞާގެ ބާޒާރުގައި އުރީދޫ މޯލްޑިވްސް ލިސްޓު ކުރެވިގެންދިއުމަކީ ރާއްޖޭގައި އުރީދޫއަށް ލިބިފައިވާ ކުރިއެރުން ދައްކުވައިދޭ ކަމެއް ކަމަށެވެ.

އަދި “ އުންމީދަކީ މުސްތަޤުބަލުގައިވެސް އުރީދޫ އިތުރު ކުރިއެރުންތައް ލިބުން “ ކަމަށާއި “ އެ ކުންފުނީގެ ކާމިޔާބީތަކުގައި ބައިވެރިވުމަށް އައު އިންވެސްޓަރުން ދަޢުވަތު އަރުވާ “ ކަމަށެވެ.

އަދި  އުރީދޫގެ މަޤްޞަދަކީ ކުންފުނީގެ ކުރިއެރުމާއި ފައިދާގެ އިތުރުން ދިވެހި ރައްޔިތުންގެ ޙަޔާތަށް އިތުރު ފުރިހަމަކަމެއް ގެނެސްދޭނެ ފުރުޞަތުތަކެއް ފޯރުކޮށްދިނުން ކަމަށާއި މި އަމާޒު ޙާޞިލުކުރުމުގައި އެ ކުންފުންޏާއި ބައިވެރިވުމަށް ދިވެހި އިންވެސްޓަރުންނަށް މަރުޙަބާ ކިޔާ ކަމަށް އުރީދޫގެ ސީއީއޯ ވިކްރަމް ސިންހަ ވިދާޅުވިއެވެ.