އޭޑީކޭ ހޮސްޕިޓަލާއި އެމްވީ މެޑިކަލްސް ގުޅިގެން މެޑިކަލް ޓޫރިޒަމް ޕްރޮމޯޓުކުރަނީ..

އޭަޑީކޭ ހޮސްޕިޓަލާއި އެމްވީ މެޑިކަލްސް ގުޅިގެން މެޑިކަލް ޓޫރިޒަމް ޕްރޮމޯޓުކުރަން ނިންމާ ފަހުމުނާމައިގާ ސޮއިކޮށްފިއެވެ.
އޭޑީކޭ ހޮސްޕިޓަލްގައި މިއަދު ބޭއްވި ރަސްމިއްޔާތެއްގައި އެ ހޮސްޕިޓަލުގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ އަޙްމަދު އަފްޢާލްއެވެ. އެމްވީ މެޑިކަލްސްގެ ފަރާތުން ސޮއި ކުރެއްވީ މާކެޓިންގ އެންޑް ޕަބްލިކް ރިލޭޝަންސް މެނޭޖަރ ޢަބްދުލްޖަލީލު ޙުސައިން އެވެ.
މި ރަސްމިއްޔާތުގައި ވާހަކަ ދައްކަވަމުން އޭޑީކޭ ހޮސްޕިޓަލްގެ އެމްޑީ ވިދާޅުވީ މިއީ ރާއްޖެއަށް ވަރަށް އާ ކަމެއް ކަމަށްވާތީ، ގިނަ ގޮންޖެހުންތަކެއް ކުރިމަތިވާނެ ކަމަށެވެ.
އެހެންނަމަވެސް ބޭނުންވަނީ ގޮންޖެހުންތަކުން އަރައިގަނެ ކުރިއަށްދިއުން ކަމަށާއި މިހަރުފަތަށް އެރީ އަނބުރާ ތިރިއަށް ފައިބަން ނޫން ކަމަށްވެސް އޭނާ ވިދާޅުވިއެވެ.
އަހަރަކު 8 ނުވަތަ 10 ބޭރުމީހުންނަށް (ފަތުރުވެރިން) ފަރުވާދިނުމަށް އަމާޒު ހިފާފައިވާ އިރު، ފުރަތަމަ އަމާޒަކީ ކަށީގެ ބަލިތަކާއި ހިތުގެ ބަލިތައް އަދި ނާރުގެ ބޮޑެތި ބަލިތައް ހުންނަ މީހުން ކަމަށްވެސް އަފްޢާލް ވިދާޅުވިއެވެ.
މިއަދު މި އެއްބަސްވި ފަހުމުނާމައިގެ ދަށުން އެފަދަ ބަލިމީހުން ރާއްޖެ ގެނައުމުގެ މަސައްކަތް އެމްވީ މެޑިކަލްސް އިން ކުރާ އިރު، އެމްވީ މެޑިކަލްސް އިން ބުނީ އެންމެބޮޑަށް ބަލާނީ މެދުއިރުމައްޗާއި އެފްރިކާގެ ޤައުމުތަކުން މީހުން ގެނައުމަށް ކަމަށެގެ.
ޖަލީލު ވިދާޅުވީ އެހެން ޤައުމުތަކާއި އަޅާބަލާ އިރު، ރާއްޖެއަށް އެތެރެވާން ފަސޭހަވުމަކީ މެޑިކަލް ޓޫރިޒަމް ރާއްޖޭގައި ހިންގަން ފަސޭހަވެ، މަގުފަހިވާނެ ކަމެއް ކަމަށެވެ.
މެޑިކަލް ޓޫރިޒަމްގެ ސަބަބުން ރާއްޖޭގެ ސިއްޙީ ދާއިރާއަށް ކުރަމުން އަންނަ އިތުބާރު މިހާރަށްވުރެ ބޮޑުވެގެންދާ އިރު، ރާއްޖެއިން ބޭރަށް ބޭސްފަރުވާއަށްދާ ދިވެހިންގެ ޢަދަދުވެސް މެޑިކަލް ޓޫރިޒަމްގެ ސަބަބުން މަދުކުރެވިދާނެ ކަމަށްވެސް ޖަލީލު ވިދާޅުވިއެވެ.

އިޝްތިހާރު