ރެމިޓެންސް ޓެކްސް އާއި ގްރީން ޓެކްސް ނަގަން ފަށައިފި

ޓޫރިސްޓް ގެސްޓްހައުސްތަކުން ނަގާ ގްރީން ޓެކްސް އާއި ވާރކް ވީޒާގެ ދަށުން ދިވެހިރާއްޖޭގައި މަސައްކަތްކުރާ ބިދޭސީން ބޭރަށް ފޮނުވާ ފައިސާއިން ނަގާ ރެމިޓެންސް ޓެކްސް ނަގަން ފަށާފައިވަނީ މިއަދުން ފެށިގެންނެވެ.

މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނީ ގްރީން ޓެކްސް ނަގާނީ ގެސްޓްހައުސް ތަކުގައި ތިބޭ ކޮންމެ ޓޫރިސްޓެއްގެ އަތުން ދުވާލަކަށް 3 އެމެރިކާ ޑޮލަރުގެ ރޭޓުން ކަމަށެވެ.

އިޝްތިހާރު

އަދި ގެސްޓްހައުސްތަކުން ގްރީން ޓެކްސް ނަގަން ފެށުމާއިގުޅިގެން ދިވެހިރާއްޖޭގެ އެކި އަތޮޅުތަކަށް މީރާގެ ޓީމުތައް ޒިޔާރަތްކޮށް ގެސްޓްހައުސް ހިންގާ ފަރާތްތަކަށް ގްރީން ޓެކުހާއިގުޅޭ މަޢުލޫމާތު ފޯރުވައިދީފައިވާ ކަމަށެވެ.

މީގެއިތުރުން މާލެއާއި އަތޮޅުތެރޭގެ ރަށްރަށުގައި ގެސްޓްހައުސް ހިންގާ ފަރާތްތަކަށް އަމާޒުކޮށްގެން ގްރީން ޓެކްސް ސެމިނަރގެ ނަމުގައި ސެމިނަރތަކެއްވެސް ވަނީ ބާއްވާފައެވެ.

ކޮންމެ މަހެއްގެވެސް ގްރީން ޓެކްސް ބަޔާންހުށަހަޅާ ފައިސާދެއްކުމުގެ ސުންގަޑިއަކީ ވިދިގެން އަންނަ މަހުގެ 28 ވަނަ ދުވަސް ކަމުގައިވެސް އެ އޮތޯރިޓީން ބުންޏެވެ.

ރެމިޓެންސް ޓެކްސް އާބެހޭގޮތުން މީރާއިން ބުނީ ވާރކް ވީޒާ ލިބިފައިވާ ބިދޭސީންނާއި ވާރކް ވީޒާ ލިބިގެން މެނުވީ ދިވެހިރާއްޖޭގައި ވަޒީފާ އަދާކުރުން މަނާ ބިދޭސީން، ރާއްޖޭން ބޭރަށް ފޮނުވާ ފައިސާއިން ރެމިޓެންސް ޓެކްސްގެ ގޮތުގައި ނެގޭނީ ބޭރަށް ފޮނުވާ ފައިސާގެ %3 ކަމަށެވެ.

25 އޮގަސްޓް 2016 ގައި ތަސްދީޤު ކުރި ވަޒީފާއާ ބެހޭ ޤާނޫނަށް 5 ވަނަ އިސްލާޙު ގެނައުމުގެ ޤާނޫނުގައި ވާގޮތުން ދިވެހިރާއްޖޭގައި މަސައްކަތްކުރުމަށް ވާރކް ވީޒާ ލިބިފައިވާ ކޮންމެ ބިދޭސީ މީހެއްގެ ނަމުގައި ދިވެހިރާއްޖޭގައި ހުރި ބޭންކެއްގައި އެ ފަރާތަކަށް ވަޒީފާ ދިން ފަރާތުން 25 ނޮވެންބަރު 2016 ގެ ކުރިން ބޭންކް އެކައުންޓެއް ހުޅުވައިދޭންޖެހޭނެ އެވެ.

އަދި މި މުއްދަތުގެ ފަހުން ބިދޭސީންނަށް މުސާރަ ދޭންވާނީ ހަމައެކަނި ބޭންކް އެކައުންޓަށް މުސާރަ ޖަމާކޮށްގެން ކަމަށާއި ބިދޭސީންގެ ބޭރަށް ފޮނުވާ ފައިސާއިން ރެމިޓެންސް ޓެކްސް ނަގައި މީރާއަށް ދައްކާނީ ބޭންކް ތަކުންނާއި ރާއްޖެއިން ބޭރަށް ފައިސާ ފޮނުވައިދިނުމުގެ ޚިދުމަތްދޭ ފަރާތްތަކުން ކަމަށްވެސް މީރާއިން ބުނެއެވެ.

ރެމިޓެންސް ޓެކުހަކީ އަލަށް ތަޢާރަފުކުރި ޓެކުހަކަށް ވުމާއެކު ބިދޭސީންނާއި ވިޔަފާރިކުރާ ފަރާތްތައް މި ޓެކުހަށް އަހުލުވެރިކުރުމުގެ ގޮތުން ތަފާތު ހަރަކާތްތައް ރޭވިފައިވާކަމަށާއި އމި ގޮތުން މާލެ އާއި އަތޮޅުތެރޭގެ ވަރަށް ގިނަ ފިހާރަތަކަށް ޒިޔާރަތްކޮށް ރެމިޓެންސް ޓެކުހާއިގުޅޭ މަޢުލޫމާތު ފޯރުވައިދެމުންދާ ކަމަށްވެސް މީރާއިން ހާމަކުރެއެވެ.