އުރީދޫގެ ނޭޝަންވައިޑް އަންޑަރސީ ކޭބަލް ރާއްޖޭގެ އެއްކޮޅުން އަނެއްކޮޅަށް އެޅުމުގެ ޢަމަލީ މަސައްކަތް ފަށައިފި

އުރީދޫ މޯލްޑިވްސް އިން ރާއްޖޭގެ ދެކުނުން އުތުރަށް އެޅުމަށް ކަނޑައަޅާފައިވާ ނޭޝަންވައިޑް އަންޑަރސީ ކޭބަލް އެޅުމުގެ އަމަލީ މަސައްކަތް ފަށައި، ކޭބަލް ސ. ހިތަދޫގައި ޤާއިމްކޮށްފައިވާ ލޭންޑިންގ ސްޓޭޝަނާއި ގުޅާލައިފިއެވެ.

ފަންސަވީސް މިލިއަން ޑޮލަރުގެ ނޭޝަންވައިޑް އަންޑަރސީ ކޭބަލް ޕްރޮޖެކްޓް ފަށައިފާވަނީ އުރީދޫއަށް ރާއްޖޭގައި އިންރޓަނެޓްގެ ޚިދުމަތް ދިނުމުގެ ލައިސެންސް ލިބުމާއެކު، ވީހާ އަވަހަކަށް ރާއްޖޭގެ ހުރިހާ ސަރަހައްދުތަކަށްވެސް އެއްފެންވަރެއްގައި ހައިސްޕީޑް އިންޓަނެޓް ފޯރުކޮށްދިނުމުގެ މަޤްސަދާއި އެކުއެވެ.

އިޝްތިހާރު

ރާއްޖޭގެ ދެކުނުން އުތުރަށް މި އަންޑަރސީ ކޭބަލް ދަމާލެވިގެންދާއިރު، ސ. ހިތަދޫ، ގދ. ތިނަދޫ، ކ.ހުޅުމާލެ، މ.ކޮޅުފުށި، ބ.އޭދަފުށި، އަދި ހދ. ކުޅުދުއްފުށީގައި ކޭބަލް ލޭންޑިންގ ސްޓޭޝަންތައްވަނީ ޤާއިމްކޮށްފައެވެ.

ހުއާވޭގެ އެޑްވާންސްޑް 100ޖީ ޓެކްނޮލޮޖީގެ ބާރުގައި، ނޭޝަންވައިޑް އަންޑަރސީ ކޭބަލް މެދުވެރިކޮށް އުރީދޫގެ ޚިދުމަތްތަކުގެ ފެންވަރު އިތުރަށް ފުރިހަމަވެ، ހަލުވި ސްޕީޑުގެ ބްރޯޑްބޭންޑް އިންޓަރނެޓް ރާއްޖޭގެ ކޮންމެ ހިސާބެއްގައިވެސް ފޯރުކޮށްދެވޭނެއެވެ.

އުރީދޫގެ މި ޕްރޮޖެކްޓްގެ އަމާޒަކީ ދިވެހިރާއްޖޭގެ ހުރިހާ ރައްޔިތުންނާއި، އެކި ކަންކޮޅުތަކުގައިވާ ވިޔަފާރިތަކަށް މިއަދުގެ ޑިޖިޓަލް ޓެކްނޮލޮޖީތަކުގެ މަންފާ ފޯރުކޮށްދިނުމެވެ. މީގެ ތެރޭގައި ޓެލެމެޑިސިންގ، ޓެލެވަރކިންގ، އޮންލައިން އެޑިއުކޭޝަން އަދި އީ-ގަވަންމަންޓްގެ ޚިދުމަތްތަށް ހިމެނެއެވެ.

އުރީދޫގެ ނޭޝަންވައިޑް އަންޑަރސީ ކޭބަލް އެޅުމުގެ ޢަމަލީ މަސައްކަތް އަންނަ ޖެނުއަރީ މަހު ނިމޭނެކަމަށް އެކުންފުނިން ލަފާކުރެއެވެ.