ބީއެމްއެލް އިސްލާމިކްގެ ފުރަތަމަ ފައިނޭންސިންގ ޕްރޮޑަކްޓްތައް ތަޢާރަފް ކުރުން މާދަމާ….
ބޭންކް އޮފް މޯލްޑިވްސް (ބީއެމްއެލް) އިސްލާމިކްގެ ފުރަތަމަ ފައިނޭންސިންގ ޕްރޮޑަކްޓްތައް މާދަމާ ތަޢާރަފް ކުރުމަށް ނިންމައިފިއެވެ.
މިގޮތުން ފުރަތަމަ ތަޢާރަފްކުރާ ޕްރޮޑަކްޓްތަކަކީ ގެދޮރު ގަތުމަށާއި ގެދޮރު ޢިމާރާތްކުރުމަށް ދޫކުރާ ފައިނޭންސިންގ ދެ ޕްރޮޑަކްޓެކެވެ. މި ޕްރޮޑަކްޓްތައް ތަޢާރަފްކުރެވިގެން ދިޔުމާއެކު އިސްލާމިކް ބޭންކިންގ އާ އެއްގޮތަށް ފައިނޭންސް ބޭނުންވާ ކަސްޓަމަރުންނަށް އެ ފުރުޞަތު ލިބިގެން ދާނެއެވެ.
ބީއެމްއެލް އިސްލާމިކް ހޯމް ޕާރޗޭސް އަމާޒުކޮށްފައިވަނީ އަލަށް ގެދޮރު ގަންނަން ބޭނުންވާ ދިވެހިންނަށެވެ. މީގެ ތެރޭގައި މާކެޓަށް އަލަށް ތަޢާރަފްކުރުމަށް ހަމަޖެހިފައިވާ ހައުސިންގގެ ދަށުން ގެދޮރު ގަންނަން ބޭނުންވާ ފަރާތްތަކަށްވެސް މި ފުރުޞަތު ލިބިގެންދާނެއެވެ.
ބީއެމްއެލް އިސްލާމިކް ހޯމް ކޮންސްޓްރަކްޝަން އަކީ އަމިއްލަ ފަރުދުންނާއި ޢާއިލާތަކުން އެ ފަރާތެއްގެ އަމިއްލަ ގެދޮރު ހެދުމަށް ނުވަތަ މަރާމާތްކުރުމަށް ބޭނުންވާ ފައިނޭންސް ހޯދުމަށެވެ. މި ދެ ޕްރޮޑަކްޓްވެސް ބޭންކުން ދޫކުރާނީ ވާދަވެރި ފައިނޭންސިންގ ރޭޓެއްގައެވެ.
މި ފައިނޭންސިންގ ޕްރޮޑަކްޓްތަކާ ގުޅޭގޮތުން ބީއެމްއެލްގެ އިސްލާމިކް ބޭންކިންގ ޑައިރެކްޓަރ ފާތިމަތު މަނިކެ ވިދާޅުވީ “ ބީއެމްއެލް އިސްލާމިކްގެ ފުރަތަމަ ފައިނޭންސިންގ ޕްރޮޑަކްޓްތައް ތަޢާރަފްކުރެވިގެން ދިޔުމަކީ ލިބޭ ވަރަށް ބޮޑު އުފަލެއް“ ކަމަށެވެ.
އަދި މިއީ ވަކިން ޚާއްޞަކޮށް އިސްލާމިކް ފައިނޭންސިންގ ފުރުޞަތު ހޯދުމަށް ބޭނުންވާ ކަސްޓަމަރުންނަށް ލިބޭނެ ވަރަށް މުހިންމު ޚަބަރަކަށް ވެގެންދާނެ ކަމަށާއި މި ފައިނޭންސިންގ އާ ބެހޭ އިތުރު ތަފްޞީލް ކުރިއަށް ހުރި ހަފްތާތަކުގައި ހާމަކުރާނެ ކަމަށްވެސް އޭނާ ވިދާޅުވިއެވެ.
މިލިޔުން ކިޔާލުމުން
