ހަތަރު ސަތޭކަ ވިޔަފާރިވެރިންނާއެކު އިންވެސްޓްމެންޓް ފޯރަމް ފަށައިފި

ހަތަރު ސަތޭކަ ވިޔަފާރިވެރިންނާއެކު ދިވެހިރާއްޖޭގެ 3ވަނަ އިންވެސްޓުމެންޓު ފޯރަމު ރަސްމީކޮށް އިންޑިއާގެ ވެރިރަށް ނިއުދިއްލީގައި ފަށައިފިއެވެ.

މިފަހަރުގެ ފޯރަމުގައި ރާއްޖެއާއި އިންޑިޔާގެ ޖުމްލަ 400 ވިޔަފާރިއަކުން ވަނީ ބައިވެރިވެފައެވެ. އޭގެތެރޭގައި އިންޑިޔާގެ މަޝްހޫރު ކުންފުނިތައްވެސް ހިމެނެއެވެ.

އިޝްތިހާރު

އިންޑިޔާގެ އެންމެ ބޮޑު ވިޔަފާރި ޖަމިއްޔާ ކަމުގައިވާ އިންޑިޔާ ޗެމްބަރސް އޮފް ކޮމާސް އެންޑް އިންޑަސްޓުރީސް (ޕިކީ) ގެ ބައިވެރިވުމާއެކު ކުރިއަށް ގެންދާ މި ފޯރަމް އިންޑިއާގެ ނިއުދިއްލީގައި ހުންނަ ތާޖު ހޮޓެލުގައި އިފުތިތާހުކޮށްދެއްވީ ދިވެހިރާއްޖޭގެ ނައިބުރައީސް އަބްދުﷲ ޖިހާދެވެ.

ރާއްޖޭގައި ހުރި އިންވެސްޓްމެންޓުގެ ފުރުޞަތުތައް އަންގައިދިނުމުގެ މަޤުޞަދުގައި ބާއްވާ މި ފޯރަމް މީގެ ކުރިން ބާއްވާފައިވަނީ ސިންގަޕޫރާއި ޗައިނާގައެވެ.

އަދި ދެން ބާއްވާ އިންވެސްޓްމެންޓު ފޯރަމް ބޭއްވުމަށް ހަމަޖެހިފަވަނީ ޤަތަރުގައިކަމަށް ސަރުކާރުން މިހާރުވަނީ އިޢުލާނުކޮށްފައެވެ.