ކިޑްނީ ބަދަލުކުރުމުގެ ޚިދުމަތް ވަރަށް އަވަހަށް ރާއްޖޭގައި ފަށާނެ: ހެލްތު މިނިސްޓަރ

ކިޑްނީ ބަދަލުކުރުމުގެ ޚިދުމަތް ވަރަށް އަވަހަށް ރާއްޖޭގައި ފަށާނެ ކަމަށް ރާއްޖޭގެ ސިއްޙަތާއިބެހޭ ވަޒީރު ޢަބްދުﷲ ނާޒިމް ވިދާޅުވެއްޖެއެވެ.

ކޮންޓިނުއަސް މެޑިކަލް އެޑިއުކޭޝަން (ސީއެމްއީ) ނެފްރޮލޮޖީ އާއި ޔޫރޮލޮޖީ އާއި ބޭހެގޮތުން މަޢުލޫމާތު ދިނުމަށް މިއަދު ބޭއްވި ޚާއްޞަ ޕްރޮގްރާމުގައި ޝަރަފްވެރި މެހްމާނުގެ ހައިޘިއްޔަތުން ވާހަކަ ދައްކަވަމުން މިނިސްޓަރ ވިދާޅުވީ އައިޖީއެމްއެޗްގައި ޤާއިމްކުރަން ހަމަޖައްސާފައިވާ ނެޝަނަލް ޔޫރޯރީނަލް އެންޑް ފާޓިލިޓީ ސެންޓަރުގެ ޒަރީޢާއިން އޯޕީޑީ އާއި އެނދުމަތިކޮށްފައިތިބޭ ބަލިމީހުންނަށް ފުލްޓައިމް ޔޫރޮލޮޖިސްޓުންގެ ޚިދުމަތް ލިބޭނެ ކަމަށެވެ.

އިޝްތިހާރު

ދަރިމައިވުމުގެ މައްސަލަތަކާއި ކުޑަކަމުދާ ނިޒާމްގެ ބަލިތަކާއި ކިޑްނީގެ ބަލިތަކަށް ފަރުވާދޭ ޚާއްޞަ މަރުކަޒު ނެޝަނަލް ޔޫރޯރީނަލް އެންޑް ފާޓިލިޓީ ސެންޓަރު“ގައި ޚިދުމަތްދޭނެ ދިވެހި ނަރުހުންނާއި އެހެނިހެން ސިއްޙީ ފަރުވާދޭ ފަންނީ ފަރާތްތައް މިހާރުވަނީ ތަމްރީނުކޮށްފައެވެ.

އައިޖީއެމްއެޗުން އިންޑިއާގެ އެންޔޫ ހޮސްޕިޓަލާއެކު ހަދާފައިވާ 15 އަހަރުގެ އެއްބަސްވުމުގެ ދަށުން އުފައްދާފައިވާ މި ސެންޓަރުގެ ޚިދުމަތް ރަސްމީކޮށް މާދަމާ ފެށުމަށް ހަމަޖެހިފައިވާއިރު، ޚިދުމަތް ހޯދުމަށް މިހާރުވެސް ނަންނޯޓު ކުރެވޭނެ ކަމަށް އައިޖީއެމްއެޗުން ބުނެއެވެ.

އަދި އެސެންޓަރުން ކިޑްނީގެ ބަލިތަކަށް ޚާއްޞަ ޑރ. އިބްރާހިމް ޝިހާމްވެސް މަސައްކަތް ކުރައްވާ އިރު، މި ސެންޓަރަށް ބޭނުންވާ ފަންނީ އާލާތްތަކާއި ޚާއްޞަ ޑޮކްޓަރުންނާއި ފަންނުވެރިން ހަމަޖައްސާފައިވަނީ އިންޑިއާގެ އެންޔޫ ހޮސްޕިޓަލުންނެވެ.

ނެޝަނަލް ޔޫރޯރީނަލް އެންޑް ފާޓިލިޓީ ސެންޓަރު ޤާއިމުކޮށްފައިވަނީ ދިވެހި ސަރުކާރުން 2.5 މިލިޔަން ރުފިޔާ އާއި އެންޔޫ ހޮސްޕިޓަލުން 6 މިލިއަން ރުފިޔާ ޚަރަދު ކޮށްގެންނެވެ.