ނުކުޅެދުންތެރިކަން ހުންނަ ފަރާތްތަކުގެ ބައެއް ބެލެނިވެރިން ގޭގައި ތިބެގެން މަސައްކަތްކުރެވޭ ގޮތަށް ޤަވާއިދު އިޞްލާޙުކޮށްފި

ސިވިލް ސަރވިސްގައި މަސައްކަތްކުރާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް ގޭގައިތިބެގެން މަސައްކަތްކުރެވޭނެ ފުރުސަތު ލިބޭގޮތަށް ސިވިލް ސަރވިސްގެ ޤަވައިދަށް އިސްލާހު ގެނެސްފި އެވެ.

އެގޮތުން ސިވިލް ސަރވިސްގައި މަސައްކަތްކުރާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް އޮފީހަށް ހާޒިރުނުވެ، އޮފީހުގެ ރަސްމީ މަސައްކަތްތައް ކުރުމަށް އެދޭ ހާލަތުގައި، އެގޮތަށް މަސައްކަތްކުރުމުގެ ހުއްދަ އެ އިދާރާއަކުން ދޭންވާނެކަމުގައި މި އިސްލާހުގައި ބަޔާންކޮށްފައިވެ އެވެ. އަދި މިފަދައިން ހުއްދަ ދެވޭނީ ނުކުޅެދުންތެރިކަން ހުންނަ ފަރާތުގެ އާންމު ދިރިއުޅުމުގައި ދުވަހުން ދުވަހަށް ކުރަންޖެހޭ ކަންތައްތަކުގައި އެހެން ފަރާތެއްގެ އެހީތެރިކަން ބޭނުންވާނެ މިންވަރު ބަޔާންކޮށް ޞިއްޙީ މަސައްކަތްތެރިޔަކު ދޫކޮށްފައިވާ ލިޔުމަށް ރިއާޔަތްކޮށްކަމުގައި ވެސް މި އިސްލާހުގައި ބަޔާންކޮށްފައިވެ އެވެ.

އިޝްތިހާރު

ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިން ދަރަޖަ ކުރެވޭނެ 3 ގޮތެއް ވެސް އެޤަވައިދުގަ ބަޔާންކޮށްފައިވެ އެވެ. އެއީ:

ދަރަޖަ 1: އާންމު ދިރިއުޅުމުގައި ދުވަހުން ދުވަހަށް ކުރަންޖެހޭ ކަންތައްތަކުގައި އެހެން ފަރާތެއްގެ އެހީތެރިކަން ކޮންމެހެން ވެސް ބޭނުންވާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިން.

ދަރަޖަ 2: އާންމު ދިރިއުޅުމުގައި ދުވަހުން ދުވަހަށް ކުރަންޖެހޭ ކަންތައްތަކުގައި އެހެން ފަރާތެއްގެ އެހީތެރިކަން މެދުމިންވަރަކަށް ބޭނުންވާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިން.

ދަރަޖަ 3: އާންމު ދިރިއުޅުމުގައި ދުވަހުން ދުވަހަށް ކުރަންޖެހޭ ކަންތައްތަކުގައި އެހެން ފަރާތެއްގެ އެހީތެރިކަން ބޭނުންނުވާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިން.

މި ޤަވައިދުގައި ބަޔާންކޮށްފައިވާ ދަރަޖަ 1 ގައިވާ ބެލެނިވެރިންނަށް، މުޅި ދުވަހު އެއްކޮށް އޮފީހަށް ހާޒިރުނުވެ މަސައްކަތްކުރުމުގެ ހުއްދަދޭންވާނެކަމަށާއި، އަދި ދަރަޖަ 2 އަދި 3 ގައި ބަޔާންކުރާ ބެލެނިވެރިން އޮފީހަށް ހާޒިރުނުވެ މަސައްކަތްކުރުމުގެ ހުއްދަ ދޭންވާނީ ނުކުޅެދުންތެރިކަން ހުންނަ ފަރާތުގެ ގާތުގައި ކޮންމެހެންވެސް ހުންނަންޖެހޭ ހާލަތެއް މެދުވެރިވެއްޖެނަމަ އެވެ.

މި ޤަވައިދުގެ ދަށުން، ނުކުޅެދުންތެރިކަން ހުންނަ ފަރާތެއްކަމުގައި ބަލާނީ، ޤާނޫނު ނަންބަރު 2010/8 (ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނު) އާއި، އެ ޤާނޫނުން ބާރު ލިބިގެން ހަދާފައިވާ ގަވައިދުތަކުގައިވާ ގޮތުގެ މަތީން ނުކުޅެދުންތެރިކަން ހުންނަ ފަރާތެއް ކަމުގައި ކަނޑައަޅައ ނުކުޅެދުންތެރިކަން ހުންނަ މީހުންގެ ދަފްތަރުގައި ރެޖިސްޓްރީވެފައިވާ ފަރާތްތަކެވެ. އަދި އެފަރާތެއްގެ ބެލެނިވެރިން ކަމުގައި ބަލާނީ މަންމަ ނުވަތަ ބައްޕަ ނުވަތަ ޝަރުޢީ ބަލަދުވެރިޔާ އެވެ.

އޮފީހަށް ހާޒިރުނުވެ މަސައްކަތްކުރުމުގެ ހުއްދަ ދިނުމުގެ އިދާރީ އިންތިޒާމުތައް ހަމަޖައްސަންޖެހޭ ގޮތްތަކާއި، ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް ބަފަރ ޓައިމް ކަނޑައެޅުމުގައި އަމަލުކުރާނެ ގޮތްތަކުގެ އިތުރުން ހުސްވަގުތުކޮޅާ ގުޅުވައިގެން އިތުރު ވަގުތު ދޭނެގޮތްވެސް މި ޤަވައިދަށް ގެނައި އިސްލާހުގައި ބަޔާންކޮށްފައިވެ އެވެ.

މި ގަވާއިދަށް ޢަމަލުކުރަން ފަށާފައިވަނީ 2026 މާރިޗު 1 ވަނަ ދުވަހުން ފެށިގެންނެވެ.