ކައުންސިލުތަކަށް އިދާރީ މުވައްޒަފުން ނުލިބޭ މައްސަލަ ހައްލުކުރަން މަސައްކަތް އެބަކުރެވޭ- މިނިސްޓަރ

ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ ހައްލުކުރުމުގެ މަސައްކަތް ކުރައްވަމުންދާ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފް ޢުމަރު ވިދާޅުވެއްޖެ އެވެ.

މިނިސްޓަރ “އެކްސް“ ގައި މިއަދު ކުރެއްވި ޕޯސްޓެއްގައި ވިދާޅުވީ ފަތުރުވެރިކަމާއި އެނޫންވެސް އިޤުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އަންނަނީ އިތުރުވަމުން ކަމަށެވެ.

އިޝްތިހާރު

“މި މައްސަލަ ހައްލު ކުރުމަށް ގުޅުންހުރި މުއައްސަސާތަކާއެކު މިދަނީ މަސައްކަތް ކުރަމުން“ މިނިސްޓަރ ވިދާޅުވި އެވެ.

ރައްޔިތުންނަށް ލާމަރުކަޒީކޮށް ޚިދުމަތް ދިނުމަށް ކައުންސިލުތަކުގެ އިދާރާތަކުގެ ޢުމްރާނީ ހާލަތު ރަނގަޅުކުރަން މިނިސްޓްރީން ވަނީ 55 ކައުންސިލް އިދާރާ އިމާރާތްކުރުމުގެ ޢަމަލީ މަސައްކަތް ފަށާފަ އެވެ.

ކައުންސިލުތައް އިމާރާތްކުރުމާ ގުޅޭ ގޮތުން މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ 55 ކައުންސިލް އިދާރާ އިމާރާތްކުރުމުގެ މަޝްރޫއު ނިމޭއިރު، ޚިދުމަތް ދިނުމަށް ބޭނުންވާ ހުރިހާ ކަމެއް ހުންނާނީ އިދާރާތަކުގައި ފުރިހަމަވެފައި ކަމަށެވެ.

މި އަހަރުގެ ތެރޭގައި އެ 55 ކައުންސިލް އިދާރާގެ މަސައްކަތް ނިމި، ރައްޔިތުންނަށް ޚިދުމަތް ދޭން ފެށޭނެ ކަމަށާއި ހަމައެއާއެކު، ސަރުކާރުން ހިންގާ ޕީ.އެސް.އައި.ޕީ.ގެ ދަށުން 6 ކައުންސިލް އިދާރާއެއްގެ މަސައްކަތް މިހާރު ނިންމާފައިވާކަން ރައީސްގެ ވާހަކަފުޅުގައި ފާހަގަކުރައްވާފައިވެ އެވެ.

މީގެ އިތުރުން ޗައިނާ ސަރުކާރުގެ ހިލޭ އެހީގައި އިމާރާތްކުރާ 50 ކައުންސިލް އިދާރާ ޕްރޮޖެކްޓްގެ ފީޒިބިލިޓީ ދިރާސާ ނިމިފައިވާއިރު މިހާރު ކުރިއަށް ދަނީ ކައުންސިލް އިދާރާ އަޅާނެ ބިން ހޯދުމާއި، އެނޫންވެސް އިދާރީ މަސައްކަތްތަކެވެ.