އިސްލާމްދީނުގައި ތަޢުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުމެއްނޫން: ހުކުރު ޚުތުބާ

މިހަފްތާގެ ހުކުރު ޚުތުބާ ގެނެސްދީފައިވަނީ ވަށައިޖެހޭ ތަޢުލީމުގެމަތީގައި އުންމަތް ބިނާކުރުމާއި ބެހޭގޮތުންނެވެ. އެގޮތުން އިސްލާމްދީނުގައި ތަޢުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުމެއްނޫން ކަމަށާއި، އެ ތަޢުލީމާއި ތަރުބިޔަތު ވާންޖެހޭނީ އެ ކުދީންގެ ބުއްދިއާއި އަޚުލާޤަށް ފުރިހަމަކަން ގެނެސްދޭ، ޞާލިޙު އިންސާނަކު ބިނާކުރުމަށް ޓަކައި، ފޯރުކޮށްދެވޭ، ވަށައިޖެހޭ ތަޢުލީމަކަށް ކަމަށް ބުނެފައިވެ އެވެ. އަދި މުދައްރިސުން، ދަރިވަރުންގެ ބުއްދި ތަރައްޤީކޮށްދޭ ފަދައިން، އެ ކުދީންގެ ހިތްތަކުގައި އީމާންކަމާއި މަތިވެރި އަޚުލާޤުގެ ބިންގާ އަޅައިދިނުމަށާއި، އެ ކުދީންގެ ޅަނދޮޅު ހިތްތަކަށް ރޫޙާނީ ދިރުން ގެނެސްދިނުމަށް ވެސް ގޮވާލާފައިވެ އެވެ. 

މީގެ އިތުރުން ދަރިވަރުން މުދައްރިސުންނަށް އިޙްތިރާމް ކުރުމަށާއި، މަދަރުސާގެ އުޞޫލުތަކަށް ޙުރުމަތްތެރިކޮށްހިތުމާއި، ވަގުތާއި މަސައްކަތްތައް ރާވައިލުމަށާއި، ބޭނުމެއް ނެތް ކަންކަމުގައި ވަގުތު ހޭދަނުކުރުމަށް ޚުތުބާގައި ނަސޭޙަތްތެރިވެފައި ވެއެވެ. 

އިޝްތިހާރު

“ އުނގެނުމުގެ މަގަކީ، ދިގު މަގެކެވެ. އެއީ ބުރަ މަސައްކަތެކެވެ. އެހެނަސް، އެއީ ސުވަރުގެއަށް މަގު ފަހިކޮށްދޭ، އަޖުރު މަތިވެރި ޖިހާދެކެވެ.“ ޚުތުބާގައި ބުނެފައިވެ އެވެ. 

މުދައްރިސުންނަށް ހިތްވަރުދެއްވަވައި، އެބޭފުޅުންނަކީ ޢިލްމު އުނގަންނައިދިނުމުގެ މަތިވެރި ވަޒީފާ ޚިޔާރުކުރައްވައިގެން ތިއްބެވި މުރައްބީން ކަމަށާއި، ކުރިމަގަށް ޓަކައި އެ ކުދީން ބިނާކުރާ މޭސްތިރީން އަދި ޢިލްމާއި މަޢުރިފާގެ ނޫރުން ދަރިވަރުންގެ ހިތްތައް އަލިކޮށް ރޯޝަންކޮށްދޭ ދަންމަރުތަކެއް ކަމަށް ވެސް ޚުތުބާގައި ބުނެފައިވެ އެވެ. ކޮންމެ މާއްދާއެއް ކިޔަވައިދިންކަމުގައި ވިޔަސް އިސްލާމްދީނުގެ އަޞްލުތަކާއި ތަރަހައިގެ ތެރެއަށް ފެއްތުމަކީ މުދައްރިސުންގެ މަސްއޫލިއްޔަތެއް ކަމަށާއި، އެއީ ނުހަނު ބޮޑު އަމާނާތެއް ކަމަށް ވެސް ޚުތުބާގައި ހަނދުމަކޮށްދީފައި ވެއެވެ. 

އިސްލާމްދީނުގައި ޢިލްމުވެރީންގެ ދަރަޖަ އެތައް ގުނައަކަށް އުފުލިގެންވެއެވެ. މާތް الله ވަޙީކުރައްވައިފައި ވެއެވެ. ”ތިޔަބައިމީހުންގެ ތެރެއިން އީމާންވީ މީހުންނާއި، ޢިލްމު ލިބިގެންވާ މީހުން الله ދަރަޖަތަކަކަށް އުފުއްލަވާނެތެވެ. اللهއީ، ތިޔަބައިމީހުންކުރާ ކަންތައް މޮޅަށް ދެނެވޮޑިގެންވާ ރަސްކަލާނގެއެވެ.“ 

މީގެ އިތުރުން ދަރީން މަދަރުސާއަށް ފޮނުވުމުން ބެލެނިވެރީންގެ ޒިންމާ އެ ހިސާބުން ނިމުނީކަމުގައި ނުދެކުމަށާއި އެ ކުދީންނަށް ބޭނުންވާ ތަކެތި ހޯދައިދޭ ފަދައިން، އެ ކުދީންނަށް ހިތްވަރުދީ އިތުބާރު ވެސް ހޯދައިދިނުމަށް ބެލެނިވެރިންނަށް ޚުތުބާގައި ނަސޭޙަތްތެރިވެފައި ވެއެވެ.

“ ދަރިވަރުންގެ ޞިއްޙަތާއި، އެ ކުދީންނަށް އަންނަ ޖިސްމާނީ އަދި ނަފުސާނީ ބަދަލުތަކަށް ހޭލުންތެރިކުރުވާ އެންމެ ގާތް އެކުވެރިޔާއަށް ވާށެވެ! ޢާއިލީ ނުތަނަވަސްކަމާއި މުޖުތަމަޢުން ކުރިމަތިވާ ތުރާތަކުން ދަރީން ދުރުކޮށްދީ، އެ ކުދީން ރައްކާތެރިކޮށްދޭ އައްޑަނައަކަށްވާށެވެ! ކާމިޔާބީގައި ބައިވެރިވެ، ތަރުޙީބުދޭށެވެ! ނާކާމިޔާބީގައި އަތުގައި ހިފައި، އައު ޢަޒުމަކާ އެކު ކުރިއަށްދާން ހިތްވަރުދޭށެވެ!“ 

ހަމައެކާއެކު ކަމާބެހޭ އިދާރާތަކުގެ ވެރިންނާއި މުޚާތަބުކޮށް ތަޢުލީމީ ސިޔާސަތުތައް ޒަމާނާ ގުޅޭ ގޮތަށް މުރާޖަޢާކޮށް ހަރުދަނާކުރުމަށް ގޮވާލާފައިވެ އެވެ. މަންހަޖުތަކާއި މުޤައްރަރުތައް އިލާހީ މަންހަޖާ އެއް ގޮތަށް، ދުރު ރާސްތާގެ ސާބިތު އަމާޒުތަކެއްގެ މައްޗަށް ބިނާކުރުމަށާއި، ތަޢުލީމުގެ އަސާސީ ބިންގާތަކަށް ލޮޅުން ނާރާނޭހެން ކަންކަން ތަރުތީބުކުރުމަކީ، އަންނާން އޮތް ޖީލުތަކަށް ޓަކައި އެފަރާތްތަކުގެ ކޮނޑުގައި އެޅިފައިވާ ބޮޑު މަސްއޫލިއްޔަތެއް ކަމަށް ބުނެފައިވެ އެވެ. 

“ ޢިލްމު އުނގެނުމުގެ މައިގަނޑު ބޭނުމަކީ ހަމައެކަނި މަޢުލޫމާތުތަކެއް ދަސްކޮށް، އިމްތިޙާނުތަކަކުން ފާސްވުމެއްނޫނެވެ. އެހެނެއްކަމަކު، އެއީ އިންސާނާގެ ބުއްދިއާއި ޒަމީރު ހޭލައްވައިލާ ދިރުމެކެވެ. ޢިލްމަކީ ޖާހިލުކަމުގެ އަނދިރީން އިންސާނާ ނެރެދީ، ޙައްޤާއި ބާޠިލު ވަކިކޮށްދޭ ނޫރެކެވެ. ޢިލްމުގެ އަސްލު މަޤުޞަދަކީ އިންސާނާގެ ކިބައިގައި މަތިވެރި އަޚުލާޤާއި، މާތް اللهއަށް ބިރުވެތިވުމުގެ ސިފަ އަށަގަންނެވުމާ އެކު، ބިން ހެޔޮ ގޮތުގައި ޢިމާރާތްކޮށް، މުޖުތަމަޢަށް ފައިދާކޮށްދޭނޭ، ޞާލިޙު ބަޔަކު ބިނާކުރުމެވެ.“ ޚުތުބާގައި ބުނެފައިވެ އެވެ. 

ޢިލްމަކީ ޖާހިލުކަމުގެ އަނދިރީން އިންސާނާ ނެރެދީ، ޙައްޤާއި ބާޠިލު ވަކިކޮށްދޭ ނޫރެކެވެ.  ޢިލްމުގެ އަސްލު މަޤުޞަދަކީ އިންސާނާގެ ކިބައިގައި މަތިވެރި އަޚުލާޤާއި، މާތް اللهއަށް ބިރުވެތިވުމުގެ ސިފަ އަށަގަންނެވުމާ އެކު، ބިން ހެޔޮ ގޮތުގައި ޢިމާރާތްކޮށް، މުޖުތަމަޢަށް ފައިދާކޮށްދޭނޭ، ޞާލިޙު ބަޔަކު ބިނާކުރުމެވެ.