އަންހެނުންނަށް އެންމެ ކަމުދަނީ ފިރިހެނުންގެ ކޮންސިފަތަކެއް!
މީހަކާ އެކު ދިރިއުޅުމުގެ ބޮޑު ނިންމުމެއް ނިންމުމުގެ ކުރިން، ތިމާ ބައިވެރިއެއްގެ ކިބައިން ބޭނުންވަނީ ކޮން ކަންތައްތަކެއްކަމާއި، އަދި އެމީހަކު ބައިވެރިއެއްގެ ކިބައިން އުންމީދުކުރަނީ ކޮން ސިފަތަކެއްކަން ދެނެގަތުމަކީ ވަރަށް މުހިންމު ކަމެކެވެ.
ކޮންމެ ބަދަހި ގުޅުމެއްގެ ބިންގަލަކީ އަސާސީ އަދި ހަރުދަނާ ސިފަތަކެކެވެ. އަންހެނުން އެމީހުންގެ މުޅި އުމުރު ހޭދަކުރާނެ ބައިވެރިއެއް އިޚްތިޔާރުކުރާއިރު، ވަގުތާއެކު ބަދަލުނުވާނެފަދަ މުހިންމު ސިފަތަކަކަށް ބަލަ އެވެ. ކޮންމެ އަންހެނަކީ ތަފާތު މިޒާޖެއްގެ މީހަކަށް ވީނަމަވެސް، މާހިރުން ފާހަގަކުރާ ގޮތުގައި ފިރިހެނެއްގެ ކިބައިގައި ހުރުން ލާޒިމު އަސާސީ އަށް ސިފައެއް ވެއެވެ. މިކަމާ ގުޅޭ ބައެއް މުހިންމު ނުކުތާތައް ތިރީގައި އެވަނީ އެވެ.
އަމިއްލަ ނަފްސަށް އޮންނަ އިތުބާރު (ކޮންފިޑެންސް)
ފިރިހެނަކީ އަމިއްލަ ނަފްސަށް އިތުބާރުކުރާ، އޭނާއަކީ ކާކުކަން ދަންނަ، އަދި ދިރިއުޅުމުގައި ބޭނުންވާ މަގްސަދުތައް ސާފު މީހަކަށް ވާނަމަ، އެއީ އަންހެނުން ވަރަށް ގަޔާވާ، ވަރަށް އަޅައިގަންނަ ސިފައެކެވެ. މި ސިފައަކީ އޭނާގެ އަމަލުތަކާއި އުޅުމުން ވަރަށް ފަސޭހައިން ފާހަގަކުރެވޭނެ ކަމެކެވެ.
އިތުބާރު ހިފޭ މީހަކަށް ވުން
ފިރިހެނަކީ ތެދުވެރި އަދި އިތުބާރު ހިފޭ މީހަކަށް ވެއްޖެނަމަ، އަންހެނުންގެ ހިތުގައި އޭނާއަށް އޮންނަ ޝައުގުވެރިކަން ވަގުތުން އިތުރުވެގެންދެއެވެ. އޭނާއަކީ ބަރޯސާވެވޭ، ތެދުބަހުން ވާހަކަދައްކާ، އަދި އިޚްލާޞްތެރި މީހަކަށް ވާނަމަ، އެއީ ގުޅުން ބަދަހިކުރަން އެންމެ އެކަށީގެންވާ މީހާއެވެ. ސަބަބަކީ އޭނާ ދައްކާ ވާހަކައަކަށް ފުރިހަމައަށް އިތުބާރު ކުރެވޭނެތީ އެވެ. އިތުބާރަކީ ގުޅުންތައް އިތުރަށް ވަރުގަދަކޮށް، ފުންކޮށްދޭ އަސާސެކެވެ.
އަޚްލާޤީ ގޮތުން ހަރުދަނާވުން
މީގެ މާނައަކީ ރަނގަޅު އަޚްލާޤެއްގެ މަތީގައި ސާބިތުވެ ހުރުމާއި، މާތް ސިފަތަކެއް ލިބިގެންވުމެވެ. އެކުގައި މުޅި ޙަޔާތް ވޭތުކުރުމަށްޓަކައި އަންހެނުން ބޭނުންވަނީ އަބުރުވެރި، އިންސާފުވެރި، އަދި އުޞޫލުތަކަށް ބޯލަނބާ ފިރިހެނެކެވެ. ގުޅުމެއްގެ ތެރޭގައި މިފަދަ ހަރުދަނާ އުޞޫލުތަކެއް ހުރުމަކީ ދެމީހުންގެ ދެމެދުގައި އޮންނަ ގުޅުން ބަދަހިކޮށްދޭނެ ކަމެކެވެ. ސަބަބަކީ އޭނާގެ ދިރިއުޅުމުގެ އުޞޫލުތަކުގެ ސަބަބުން، އޭނާއަކީ ރަނގަޅު ބައިވެރިއަކަށް ވުމަށް މަގުފަހިވެގެންދާނެތީ އެވެ.
އޯގާތެރިކަމާއި ހަމްދަރުދީ
އަންހެނުންގެ ސަމާލުކަން ހޯދުމުގައި، އޯގާތެރިކަމާއި ހަމްދަރުދީ އިސްކުރާ ފިރިހެނުން އަބަދުވެސް ކުރިހޯދަ އެވެ. އަންހެނުން ބޭނުންވަނީ އޮފީހުގައި ދިމާވާ ދަތި ކަންކަމުން ފެށިގެން، އެމީހުންގެ ހިތުގެ އެންމެ ފުންމިނުގައިވާ އުންމީދުތަކާއި ބިރުވެރިކަން ހިއްސާކުރެވޭ ފަދަ، އަޑުއަހާނެ ގާތް މީހެކެވެ. ހަމްދަރުދީވުމަކީ އަނެކާގެ ނަޒަރިއްޔާތުން ކަންކަން ދެނެގަނެ، އެމީހުން ތަހައްމަލު ކުރަމުންދާ އިހުސާސްތައް ވަޒަންކުރުމުގެ ގާބިލުކަން ހުރުމެވެ. މީގެ އިތުރުން، އެހެން މީހުންނަށް އަޅާލުމާއި އޯގާތެރިކަން ދޭން ބޭނުންވާ ފިރިހެނުންނަށް އަންހެނުން ވަރަށް ބޮޑަށް ޝައުޤުވެރިވެ އެވެ.
އިހުސާސްތައް ހާމަކުރުން
އިހުސާސްތައް ފޮރުވައިގެން ގުޅުން ބާއްވަން އުނދަގޫވާ މީހަކަށްވުރެ، ތެދުވެރިކަމާއެކު އަމިއްލަ އިހުސާސްތައް ބަޔާންކުރަން ކެރޭ ފިރިހެނުންނަށް އަންހެނުން އިސްކަންދެ އެވެ. އަމިއްލަ އިހުސާސްތައް ފާޅުކުރުމަކީ ފުރަތަމަކޮޅު އުނދަގޫ، ނުވަތަ އާދަޔާ ހިލާފު ކަމަކަށް ވީނަމަވެސް، ދާއިމީ ގުޅުމެއް ބިނާކުރުމަށްޓަކައި ތިމާގެ އިންސާނީވަންތަ އަދި ނާޒުކު ފަރާތް ދެއްކުމަކީ ކޮންމެހެން ބޭނުންތެރި ކަމެކެވެ. ކަންކަން ހިތުގައި ފޮރުވައިގެން ހުންނަ މީހަކަށްވުރެ، ބިރުގަތުމެއް ނެތި ހަގީގީ އިހުސާސްތައް ހާމަކޮށް، އެކަންކަމާ މަޝްވަރާކުރާ ފިރިހެނުންނަށް އަންހެނުން ލޯބިކުރެ އެވެ.
އިޙްތިރާމްކުރުން
ބާއްޖަވެރި އަދި ކާމިޔާބު ގުޅުމެއްގެ ބިންގަލަކީ ދެފަރާތުން އެކަކު އަނެކަކަށް ކުރާ އިހުތިރާމެވެ. އަންހެނަކު އޭނާގެ އަގު ވަޒަންނުކުރާކަން ނުވަތަ އިހާނެތިކޮށް ކަންތައް ކުރާކަން އިހުސާސް ކުރެވޭނަމަ، ހިތާމައެއް ލިބުމުގެ ކުރިން އެ ގުޅުމެއް ނިމުމަކަށް ގެނައުމަކީ އެކަށީގެންވާ ކަމެކެވެ. މީހަކަށް އިހުތިރާމް ނުކުރާކަން ނުވަތަ ދެރަގޮތްގޮތަށް ކަންތައް ކުރާކަން އިހުސާސްވާނަމަ، އެ ގުޅުމެއް ވަރަށް އަވަހަށް ނިމުމަކަށް އާދެ އެވެ. އަންހެނުން އަބަދުވެސް ލެނބެނީ އެމީހުންނަށް އޯގާތެރިކަމާއެކު، ހައްގުވާ މިންވަރަށް ފުރިހަމަ އިހުތިރާމްދޭ ފިރިހެނުންނަށެވެ.
ސަމާސާކުރުމުގެ މިޒާޖު
އަންހެނެއްގެ ސަމާލުކަން ހޯދުމަށްޓަކައި ތިބާއަކީ ކޮންމެހެން މޮޅު ކޮމީޑިއަންއަކަށް ނުވަތަ މަޖާ ވާހަކަ ލިޔާ މީހަކަށް ވާކަށް ނުޖެހެ އެވެ. ނަމަވެސް، ހިތްހަމަޖެހިލައިގެން ސަމާސާކޮށް، މަޖާކޮށްލުމުގެ ގާބިލުކަން ހުރުމަކީ މީހާގެ މަގުބޫލުކަން އިތުރުކޮށްދޭ ކަމެކެވެ. ދެމީހަކު އެއް ކަމަކާ ހިނިތުންވެ، ހީނލުމަކީ އެ ދެމީހުންގެ ވިސްނުމާއި، ގަބޫލުކުރާ އުސޫލުތަކާއި، އަދި ހިތްހަމަޖެހޭ ކަންތައްތައް އެއްގޮތްކަން ހާމަކޮށްދޭ ކަމެކެވެ. މިއީ ސައިންޓިފިކް ގޮތުން ވެސް ބަލާއިރު ވަރަށް ސާދާ ކަމެކެވެ. އުފާވެރި، ހިތްހެޔޮ މީހަކާއެކު ވަގުތު ހޭދަކުރަން ކޮންމެ އަންހެނަކު ވެސް ބޭނުންވާނެ އެވެ.
ހަރުދަނާކަމާއި ވިސްނުންތެރިކަން
މަތީގައި ބަޔާންކުރި ސިފަތައް ތިބާގެ ކިބައިގައި ހުރި ނަމަ، އޭގެ މާނައަކީ ތިބާގެ ކިބައިގައި ހަރުދަނާކަން ވެސް ހުރި ކަމެވެ. އަންހެނަކަށް ތިބާގެ ކިބައިގައި ނަފްސާނީ ގޮތުންނާއި ވިސްނުމުގެ ގޮތުން ހަރުދަނާކަން ހުރިކަން ދެއްކުމަކީ މުހިންމު ކަމެކެވެ. މީގެ ތެރޭގައި ކަންކަމުގައި ހުޅުވާލެވިފައިވާ މުއާމަލާތްތައް ކުރުމާއި، ކަމެއް ދިމާވާ ހިނދު ހަރުދަނާމީހެއް ފަދައިން ވިސްނުންތެރިކަމާއެކު އަމަލުކުރުން ހިމެނެ އެވެ. އޭގެ މާނައަކީ އަބަދު ސީރިއަސްވެގެން އުޅުމެއް ނޫނެވެ. މަޖާކޮށް އުޅުމުގެ ތެރޭގައި ވެސް، އަމިއްލަ ނަފްސުގެ ބަލިކަށި ދަނޑިވަޅުތަކާއި އިހުސާސްތައް ހާމަކުރަން ކެރުމަކީ ވެސް ހަގީގަތުގައި ހަރުދަނާ މީހެއްގެ ކިބައިގައި ހުންނަ ވަރަށް މުހިންމު ސިފައެކެވެ.
މިލިޔުން ކިޔާލުމުން
