އިސްލާމްދީނަށާއި ދިވެހި ޤައުމަށް ލޯބިކުރާ، އުޅުމާއި ސުލޫކު ރަނގަޅު، ދަރީންތަކެއް ބިނާކުރެވޭނީ، ތަޢުލީމާއި ތަރުބިއްޔަތަށް އަހައްމިއްޔަތުކަން ދީގެން ކަމުގައި ރައީސުލްޖުމުހޫރިއްޔާ ވިދާޅުވެއްޖެ
އިސްލާމްދީނަށާއި ދިވެހި ޤައުމަށް ލޯބިކުރާ، އުޅުމާއި ސުލޫކު ރަނގަޅު، ހަރުދަނާ އަދި ހީވާގި ދަރީންތަކެއް، މި ޤައުމުގައި ބިނާކުރެވޭނީ، ތަޢުލީމާއި ތަރުބިއްޔަތަށް އަހައްމިއްޔަތުކަން ދީގެން ކަމުގައި، ރައީސުލްޖުމުހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވެފައިވަނީ، ދިރާސީ އައު އަހަރު ފެށުމުގެ މުނާސަބަތުގައި އެކްސް އެކައުންޓުގައި ހިއްސާކުރެއްވި މެސެޖެއްގައެވެ.
އެމަނިކުފާނުގެ މެސެޖުގައި، ދިރާސީ އާއަހަރު، މިއަދު ފެށުމާ ގުޅިގެން، ތަޢުލީމީ ދާއިރާގެ އެންމެހާ ހިންގުންތެރީންނާ، ޓީޗަރުންނާ، ބެލެނިވެރީންނާ، ދަރިވަރުންނަށްވެސް ކާމިޔާބީ އަށް އެދިވަޑައިގެންފައި ވެއެވެ.
އެމަނިކުފާނުގެ މެސެޖު ނިންމަވާލައްވާފައިވަނީ، ތަޢުލީމީ ނިޒާމު ހަރުދަނާކޮށް ކުރިއެރުވުމަށާއި ހެޔޮލަފާ، ތޫނުފިލި، އުޅުންރީތި، ދަރީންތަކެއް، ދިވެހި ތަޢުލީމީ ހިޔާވަހިތަކުގައި، ބޮޑެތި ކުރުމުގެ ހެޔޮ ތައުފީޤު ދެއްވުން އެދި ދުޢާ ކުރައްވަމުންނެވެ.
ދިރާސީ އާ އަހަރު ފެށުމުގެ މުނާސަބަތުގައި ރައީސުލްޖުމުހޫރިއްޔާގެ އަނބިކަނބަލުން ސާޖިދާ މުޙައްމަދު ފޮނުއްވި މެސެޖުގައި، ދިރާސީ އައު އަހަރުގެ ހެޔޮ އެދުމާއި ތަހުނިޔާ، ދަރިވަރުންނާއި، ބެލެނިވެރިންނާ، އެދުރުންނާ، ހިންގުންތެރިންނާ، އެހީތެރިންނަށް އަރިސްކުރައްވާފައި ވެއެވެ. އަދި، ކޮންމެ ކިޔަވާ ކުއްޖަކަށްވެސް މި ދިރާސީ އައު އަހަރަކީ، ފާގަތި، ބާއްޖަވެރި އަހަރަކަށް ވުމަށް އެދިވަޑައިގެންފައި ވެއެވެ.
މިލިޔުން ކިޔާލުމުން
