އާއިލާއެއްގެ ތެރޭގައި ބޮޑުވުން، ކުދިންގެ ހެދިބޮޑުވުމަށް ވަރަށް ގިނަ ފައިދާތަކެއް

އާއިލާއެއްގެ ތެރޭގައި ބޮޑުވެ މުޖުތަމަޢުގެ ތެރޭގައި އުޅެން ދަސްވުމަކީ ކުދިން ޖިސްމާނީ އަދި ނަފްސާނީ ގޮތުން ހެދިބޮޑުވުމަށް ވަރަށް ގިނަ ފައިދާތަކެއް ލިބޭކަމެއް ކަމުގައި އިޖުތިމާޢީ އަދި ޢާއިލީ ތަރައްޤީއާއި ބެހޭ ވުޒާރާގެ ލީޑް ޗައިލްޑް ޕްރޮޓެކްޝަން އޮފިސަރ ފައްޒަ ފުއާދު ވިދާޅުވެއްޖެއެވެ.

ފައްޒަ މިފަދައިން ވިދާޅުވެފައިވަނީ ރާއްޖެޓީވީގެ ފަސްކާފު ޕްރޮގްރާމުގައި މި ވުޒާރާއިން ކުރިއަށް ގެންދާ ’ކޮންމެ ކުއްޖަކަށް ޢާއިލާއެއް‘ ޕްރޮގްރާމާއި ގުޅޭ ގޮތުން މަޢުލޫމާތު ހިއްސާކުރައްވަމުންނެވެ. ’ކޮންމެ ކުއްޖަކަށް ޢާއިލާއެއް‘ ޕްރޮގްރާމަކީ ކޮންމެ ކުއްޖަކީ ވެސް ޢާއިލީ ވެއްޓެއްގެ ހިމާޔަތާއި، ލޯތްބާއެކު ބޮޑުވުމުގެ ފުރުޞަތު ލިބިފައިވާ ކުއްޖެއްކަން ޔަގީންކުރުމަށް ކުރިއަށްގެންދެވޭ މުހިންމު ޕްރޮގްރާމެކެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެއްވެސް މެއެވެ.

އިޝްތިހާރު

މި ޕްރޮގްރާމާއި ގުޅޭ މަޢުލޫމާތު ހިއްސާކުރައްވަމުން ފައްޒަ ވިދާޅުވީ، މި ޕްރޮގްރާމުގެ ދަށުން، ދަޢުލަތުގެ ބެލުމުގެ ދަށުގައި ތިބޭ ކުދިންނަށް ދެ ގޮތަކަށް ޢާއިލީ މާހައުލެއް ހޯދައިދެވޭކަމުގައެވެ. އެގޮތުން، އެއް ގޮތަކީ އެކުދިންގެ އުފަން އާއިލާގެ ތެރެއިން ނުވަތަ އާއިލާގެ ހާލަތު ރަނގަޅުކޮށް މައިންބަފައިނާއި އެކު އުޅުމަށް ޢާއިލާއާއި ހަވާލުކުރުން ކަމަށާއި، ދެވަނަ ގޮތަކީ އުފަން އާއިލާގައި އެކުދިން ބަލާނެ ފަރާތެއް ނެތް ހާލަތެއްގައި އެކުދިންނަށް ފޮސްޓަރ ފެމިލީސް ނުވަތަ އެކުދިންނާއި ޢާއިލީ ގޮތުން ގުޅުމެއް ނެތް ފަރާތްތަކާއި އެކުދިން ހަވާލުކުރުންކަމުގައެވެ.

ހަމައެހެންމެ، މި ޕްރޮގްރާމަށް ގެނެވުނު އިތުރު ބަދަލުތަކާއި އެކު ވަގުތީ ގޮތުން ކުދިން ފޮސްޓާރ ކުރުމުގެ މަސައްކަތްވެސް އަލަށް ފެށިގެން ގޮސްފައިވާކަމަށް ފައްޒަ ވަނީ ފާހަގަކުރައްވާފައެވެ. މިއީ ވަކި ހާލަތްތަކަކާއި ދިމާވެގެން ދަޢުލަތުގެ ބެލުމުގެ ދަށަށް ނެގޭ ކުދިން އެހާލަތު ބަދަލުވުމުން އަނބުރާ އާއިލާތަކަށް ދެވެންދެން ފޮސްޓަރ ކުރުމެވެ.

”ވަގުތީ ގޮތުން ފޮސްޓަރ ކުރާ ކުދިންނަކީ އެކުދިން ގެ އާއިލާއަށް އަނބުރާ ރީއިންޓެގްރޭޓް ކުރެވޭ ފުރުސަތު އޮންނަ ކުދިން. އަދި އެގޮތަށް ފޮސްޓަރ ކުރެވޭ ކުދިން، ފޮސްޓަރ ކުރުމަށް ފަހުވެސް އެކުދިންގެ އުފަން އާއިލާއާތަކާއި އެކު އަޅުގަނޑުމެންވެސް މަސައްކަތްތަކެއް ކުރަން. މިސާލަކަށް، އެކުދިން އަނބުރާ އާއިލާއަށް ދެވެންނެތް ހާލަތަކީ އެކުދިން ދިރިއުޅޭނެ އެކަށީގެންވާ ތަނެއް ނެތުން ކަމުގައި ވާނަމަ އެކަށީގެންވާ ބޯހިޔާވަހިކަމެއް ހޯދުމަށް މަސައްކަތް ކޮށްދިނުން. އާމްދަނީ ލިބޭނެ ގޮތެއް ނެތް ކަމުގައި ވަނީނަމަ އާމްދަނީ ލިބޭނެ މަސައްކަތެއް ކުރުމުގެ މަގު ފަހިކޮށްދިނުން.“ ފައްޒަ ވަނީ ފާހަގަކުރައްވާފައެވެ.

މީގެ އިތުރުން، މި ޕްރޮގްރާމުގެ ދަށުން ދަޢުލަތުގެ ބެލުމުގެ ދަށުގައި ތިބޭ ކުދިންގެ ތެރެއިން ތަޢުލީމީ މަރުހަލާ ފުރިހަމަ ކުރާ ކުދިންނަށް އިންޓާންޝިޕްގެ ފުރުސަތުތައް ފަހިކޮށްދިނުމުގެ މަސައްކަތްވެސް ކުރެވިގެންދާކަމަށާއި، އިންޓާންޝިޕްތައް ހޯދައިދެވޭއިރު އެކުދިންގެ ޢާއިލާގެ ތެރޭގައި އެއްވެސް މީހަކު އެކުދިންނާއި ހަވާލުވާން ތިބެއްޖެނަމަ އެކުދިން އާއިލާތަކާއި ހަވާލުކުރެވޭ ކަމުގައި ފައްޒަ ވިދާޅުވިއެވެ. އަދި އެފަރާތްތަކަށް އެކުދިންނާއި ހަވާލުވެވެން ނެތް ހާލަތަކީ މާލީގޮތުން އެކުދިން ބެލޭނެ ތަނަވަސްކަން ނެތުން ކަމުގައިވާނަމަ، އިންޓާންޝިޕް އެލެވެންސެއްގެ ގޮތުގައި އާއިލާއަށް އެލޮވެންސެއް ދީގެންވެސް އެކުދިން އާއިލާތަކާއި ހަވާލުކުރުމަކީ ވެސް މި ޕްރޮގްރާމުގެ ތެރޭގައި ކުރެވިގެންދާ މުހިންމު މަސައްކަތެއްގެ ގޮތުގައި ފައްޒަ ފާހަގަކުރެއްވިއެވެ.

’ކޮންމެ ކުއްޖަކަށް ޢާއިލާއެއް‘ ޕްރޮގްރާމުގެ ދަށުން، ދައުލަތުގެ ބެލުމުގެ ދަށުގައި ތިބި 75 ކުދިންގެ އުފަން އާއިލާތަކާއި މިހާތަނަށް ހަވާލުކުރެވިފައިވާކަމަށާއި، އަދި ވަގުތީ ފޮސްޓަރިންއާއި ދާއިމީކޮށް ކުއްޖާގެ އުމުރުން 18 އަހަރު ވަންދެން ޤާނޫނީ ބެލެނިވެރިކަން ފޮސްޓަރ ޕޭރެންޓަށް ބަދަލުކުރުމުގެ ދަށުން މިހާތަނަށް 35 ކުއްޖަކު ފޮސްޓަރ އާއިލާތަކާ ހަވާލުކުރެވިފައިވާކަމުގައި ފައްޒަ ވަނީ ފާހަގަކުރައްވާފައެވެ.