ބައިނަލްއަގުވާމީ ގާނޫނުތަކެއް ބޭނުމެއް ނޫން: ޑޮނަލްޑް ޓްރަމް

ބައިނަލްއަގުވާމީ ގާނޫނުތަކެއް ބޭނުމެއް ނުވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ވެނެޒުއޭލާގެ ރައީސް ނިކޮލަސް މަދޫރޯ ވަގަށްނަގައި ހައްޔަރު ކުރުމަށްފަހު އެމެރިކާގެ ރައީސް ޑޮނަލްޑް ޓްރަމްޕް ބައިނަލްއަގުވާމީ ގާނޫނުތަކަށް ގޮންޖައްސަވައި ވިދާޅުވެފައި ވަނީ، ދުނިޔޭގެ އެކި ކަންކޮޅުތަކުގައި އޭނާ ގެންގުޅުއްވާ ހަރުކަށި ސިޔާސަތުތައް ކޮންޓްރޯލް ކުރާނެ ހަމައެކަނި އެއްޗަކީ އޭނާގެ ”އަމިއްލަ މިންގަނޑުތައް“ ކަމަށެވެ.

އިޝްތިހާރު

ބުރާސްފަތި ދުވަހު ”ދަ ނިއުޔޯކް ޓައިމްސް“ އަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، ”އަހަންނަކަށް ބައިނަލްއަގުވާމީ ގާނޫނެއް ބޭނުމެއް ނުވޭ. އަހަރެން މިއުޅެނީ ބަޔަކަށް އަނިޔާއެއް ކުރާކަށް ނޫން،“ ކަމަށެވެ. ބައިނަލްއަގުވާމީ ގާނޫނުތަކަށް ބޯލަނބަން ޖެހޭތޯ ސުވާލު ކުރުމުން، ޓްރަމްޕް ވިދާޅުވީ އެކަން ބިނާވެގެންވަނީ ބައިނަލްއަގުވާމީ ގާނޫނު މާނަކުރާ ގޮތެއްގެ މައްޗަށް ކަމަށެވެ.

ޚާރިޖީ ސިޔާސަތުތައް ކާމިޔާބު ކުރުމަށްޓަކައި އެމެރިކާގެ އަސްކަރީ ބާރުގެ ބޭނުންކުރުމަށް ފަސްނުޖެހޭނެކަން ޓްރަމްޕް ވަނީ ދައްކާފައެވެ. އެގޮތުން، މިދިޔަ ހޮނިހިރު ދުވަހުގެ ފަތިހުގެ ވަގުތެއްގައި އެމެރިކާއިން ވެނެޒުއޭލާއަށް ވަރުގަދަ ހަމަލާތަކެއް ދީފައިވާއިރު، ވެރިރަށް ކަރަކަސް އާއި އެގައުމުގެ އަސްކަރީ މަރުކަޒުތަކުގައި ބޮން ގޮއްވާފައިވާ ކަމުގެ ރިޕޯޓްތައް ވަނީ ލިބިފައެވެ.

އެމެރިކާގެ ސިފައިން ވަނީ ކަރަކަސްއިން ވެނެޒުއޭލާގެ ރައީސް މަދޫރޯ ހައްޔަރުކޮށްގެން ގެންގޮސްފައެވެ. ފާޑުކިޔާ ފަރާތްތަކުން ބުނާގޮތުގައި މިއީ އދ. ގެ ޗާޓަރާ ކަނޑައެޅިގެން ޚިލާފު އަމަލެކެވެ. އެ ޗާޓަރުގައިވާ ގޮތުން އެއްވެސް ގައުމެއްގެ އިސްތިގުލާލަށް ނުވަތަ ސިޔާސީ މިނިވަންކަމަށް ހުރަސްއެޅޭ ފަދަ އެއްވެސް އަސްކަރީ ބާރެއް ބޭނުންކުރުމަކީ މަނާކަމެކެވެ.

ނިމިދިޔަ މަހު އިފްތިތާހީ ”ފީފާ ޕީސް ޕްރައިޒް“ ހާސިލްކުރެއްވި އެމެރިކާގެ ރައީސް، ވެނެޒުއޭލާއަށް ދިން މި ހަމަލާއާއެކު އޭނާގެ ހަރުކަށިކަން އިތުރަށް ވަނީ ވަރުގަދަވެފަ އެވެ. މި ހަމަލާއަށްފަހު ދެއްވި ބަޔާނެއްގައި، ޓްރަމްޕް ވިދާޅުވީ ވެނެޒުއޭލާގެ ކަންކަން ހިންގުމާ އެމެރިކާއިން ހަވާލުވާނެ ކަމަށާއި، އެ ގައުމުގައި ހުރި ތެލުގެ ބޮޑު ރިޒާވްގެ ބޭނުން އެމެރިކާއިން ހިފާނެ ކަމަށެވެ.

މީގެ އިތުރުން، އިންތިގާލީ ސަރުކާރުން އަމަލުކުރަންޖެހޭ ސިޔާސަތުތައް ކަނޑައަޅާނީ އެމެރިކާއިން ކަމަށް ޓްރަމްޕްގެ ސަރުކާރުން ބުނެފައިވެއެވެ. އަދި އެމެރިކާގެ ނިންމުންތަކަށް ބޯނުލަނބައިފިނަމަ، އަސްކަރީ ފިޔަވަޅުތަކުގެ ދެވަނަ ބުރެއް ކުރިމަތިލާން ޖެހިދާނެ ކަމުގެ އިންޒާރު ވެސް ތަކުރާރުކޮށް ވަނީ ދީފައެވެ.