މޯލްޑިވްސް މެރިން އެކްސްޕޯ މިއަދު ހުޅުވައިފި

މެރިން އިންޑަސްޓްރީގައި ހަރަކާތްތެރިވާ އެކި ފަރާތްތައް ހިމެނޭގޮތުން 32 އެގްޒިބިޓަރުންނާ އެކު ފެށި މި އެކްސްޕޯ ހުޅުއްވައިދެއްވީ އެންވަޔަރަންމަންޓް މިނިސްޓަރު ޠާރިގު އިބްރާހީމް އެވެ.

މި އެކްސްޕޯ އަކީ މެރިން ދާއިރާއާ ގުޅުންހުރި ތަފާތު ބްރޭންޑްތަކުގެ މެޝިނަރީސް އާއި ޓޫލްސް އެއްތަނަކުން ދައްކާލުމުގެ މަޤުޞަދުގައި ބާއްވާ އެކްސްޕޯ އެކެވެ.

އިޝްތިހާރު

އަދި ބޯޓުފަހަރު ބަނުމާއި ޑައިވިންގ އާއި މޫދު ކުޅިވަރަށް ބޭނުންވާ މަޝްހޫރު ބްރޭންޑްތަކުގެ އެކި ސާމާނުތައްވެސް މި އެކްސްޕޯގައި ދައްކާލުމަށް ބަހައްޓާފައި ހުންނާނެއެވެ.

މިއަހަރުގެ މެރިން އެކްސްޕޯގައި ފާއިތުވި އަހަރުތަކއި ޚިލާފަށް ޖާގަ ބޮޑުވެ ފުރިހަމަވެފައި މުޅިން އާ ހަރަކާތްތަކެއް އެކްސްޕޯގެ ތެރެއިން ތަޢާރަފްކުރާނެ ކަމަށް މި އެކްސްޕޯ ބާއްވާ ބްލަމް ކުންފުނިން ބުންޏެވެ.

އެގޮތުން މެރިން ޓޯކްސް، އާޓް ގެލެރީ އާއި އެކްސްޕޯއަށް ޒިޔާރަތްކުރާ ފަރާތްތަކަށާއި އެގްޒިބިޓަރުންނަށް މޫދު ކުޅިވަރުގެ ހަރަކާތްތަކާ އެކު މަޢލޫމާތުގެ ސެޝަންތަކާއި ފުރުޞަތުތައް މިފަހަރުގެ އެކްސްޕޯއިން ލިބިގެންދާނެ ކަމަށް އެ ފަރާތުން ބުންޏެވެ.

ހަތަރު ދުވަހުގެ މުއްދަތަށް ކުރިއަށްދާ އެކްސްޕޯ މިއަދު ފަށާފައިވާ އިރު ފުރަތަމަ ތިންދުވަސް ކަމަށްވާ ސެޕްޓެމްބަރު 27،28 އަދި 29 ވިޔަފާރި ދާއިރާގައި ހަރަކާތްތެރިވާ ފަރާތްތަކަށް ޚާއްޞަކޮށްފައިވާ އިރު، 30 ވަނަ ދުވަސް ޚާއްޞަކޮށްފައިވަނީ ޢާންމުންނަށެވެ.