ދުނިޔޭގެ ހަކުރުބަލީގެ ދުވަސް ފާހަގަކުރުމަށް އައިޖީއެމްއެޗުން ޚާއްޞަ ޙަރަކާތްތަކެއް ބާއްވައިފި

ދުނިޔޭގެ ހަކުރުބަލީގެ ދުވަސް ފާހަގަކުރުމަށް އައިޖީއެމްއެޗުން ޚާއްޞަ ޙަރަކާތްތަކެއް ބާއްވައިފިއެވެ.

މިއަދު ހެނދުނު 11.15 އިން ފެށިގެން ހަވީރު 4.00 އަށް ކުރިއަށް ގެންދިޔަ ހަރަކާތްތަކުގެ ތެރޭގައި ހަކުރު ބަލި ހުރިތޯ ބެލުމަށް ހިލޭ ޓެސްޓުކޮސްދިނުމުގެ ހަރަކާތެއް ވަނީ ކުރިއަށް ގެންގޮސްފައެވެ.

އިޝްތިހާރު

އަދި ބައްޔާއިބެހޭގޮތުން ޢާންމުން ހޭލުންތެރި ކުރުވުމަށް މަޢުލޫމާތުދިނުމާއި ދުޅަހެޔޮ ކާނާ އާއި ބެހޭގޮތުން މަޢުލޫމާތު ދިނުމުގެ ހަރަކާތެއްވެސް ވަނީ ކުރިއަށް ގެންގޮސްފައެވެ.

ހަކުރު ބައްޔަކީ ރާއްޖޭގައި މިފަހަކަށް އައިސް ވަރަށް ޢާންމުވެފައިވާ ބައްޔަކަށްވާ އިރު، މުސްކުޅި ފުރައިގެ މީހުން މިހާރު ދަނީ މި ބައްޔަށް ބޭސް ބޭނުންކުރަމުންނެވެ. އެހެންނަމަވެސް ޒުވާނުންނަށާއި މެދު ޢުމުރުގެ މީހުންނަށްވެސް މިބަލި ޖެހުމުގެ ފުރުޞަތުއޮވެއެވެ.

ހަކުރު ބައްޔަކީ ލޭގައި ހުންނަން ވާވަރަށް ވުރެ ގިނައިން ހަކުރު ނުވަތަ ”ގްލޫކޯޒް“ ހުންނާތީ ކިޔާ ނަމަކެވެ. މިހެން ދިމާވަނީ ލޭގައި ހަކުރު ގެ މިންވަރު ހިފެއްޓުމަށް ބޭނުންވާ ހޯމޯނައެއް ކަމަށްވާ އިންސިއުލިންގ ނުއުފެދޭތީ ނުވަތަ އުފެދުނު ނަމަވެސް ރަނގަޅަށް މަސައްކަތް ނުކުރާތީއެވެ.

ހަކުރު ބަލި ޖެހުމުން ގިނައިން ކުޑަކަމުދެވުމާއި އަބަދު ކަރު ހިއްކުމާއި އަބަދު ބަނޑުހައިވުން ފަދަ ޢަލާމާތްތައް ހިމެނެއެވެ. އަދި ވަރުބަލިވުމާއި މާ ބޮޑަށް ލުއިވުމާއި ލޮލުގެ ފެނުން ދަށްވުމާއި ހޮޑުލެވުމާއި ހަލާކުވާ ތަންތަން ފަސޭހައިން ރަނގަޅު ނުވުންވެސް މިއީ ހަކުރުބަލީގެ ޢަލާމާތްތަކުގެ ތެރޭގައި ހިމެނޭ ކަންކަމެވެ.

ދުނިޔޭގެ ހަކުރުބަލީގެ ދުވަހުގެ ގޮތުގައި ފާހަގަ ކުރަނީ ކޮންމެ އަހަރެއްގެވެސް ނޮވެމްބަރ މަހުގެ 14 ވަނަ ދުވަހެވެ.