ވީހާވެސް ޅަފަތުގައި ދަރިވަރުން ދުޅަހެޔޮކޮށް ބޭތިއްބުމަށް މަސައްކަތް ކުރަންޖެހޭ: ޑިފެންސް މިނިސްޓަރ

ވީހާވެސް ޅަފަތުގައި ދަރިވަރުން ދުޅަހެޔޮކޮށް ބޭތިއްބުމަށް މަސައްކަތް ކުރަންޖެހޭކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ.

އޭނާ މިހެން ވިދާޅުވީ ރާއްޖޭގެ ސުކޫލުތަކުގައި ގުރޭޑް އެކެއްގައި ކިޔަވަމުންދާ ދަރިވަރުންގެ ސިއްޙީ ދުޅަހެޔޮކަން ދެނެގަތުމަށް ކުރިއަށް ގެންދިޔަ ހެލްތް ސްކްރީން ޕްރޮގްރާމްގެ ރިޕޯޓް އެކުލަވަލާ އާންމުކުރުމަށް ހޮޓެލް ޖެންގައި މިއަދު ބޭއްވި ރަސްމިއްޔާތުގައި ރިޕޯޓު ނެރެދެއްވުމަށްފަހު ވާހަކަ ދައްކަވަމުންނެވެ.

އިޝްތިހާރު

މިނިސްޓަރ ވިދާޅުވީ އެކަމަށް ޚާއްޞަ ސަމާލުކަމެއް ދީގެން ޤައުމީ މަސައްކަތްތަކެއް ކުރުން މުހިންމު ކަމަށާއި ދަރިވަރުންގެ ސިއްޙީ ދުޅަހެޔޮ ކަމަށް އަމާޒުކޮށްގެން ކުރިއަށް ގެންދާ ޕްރޮގްރާމްތަކުގައި ޑިފެންސް މިނިސްޓްރީ އާއި އެމްއެންޑީއެފް އިން ބައިވެރިވެ ފުރިހަމައަށް އެހީތެރިކަމާއި އެއްބާރުލުން ދެމުން ގެންދާނެ ކަމަށެވެ.

ރާއްޖޭގެ ސުކޫލުތަކުގައި ގުރޭޑް އެކެއްގައި ކިޔަވާ ދަރިވަރުންގެ ހެލްތް ސްކްރީން ޕްރޮގްރާމް ކުރިއަށް ގެންގޮސްފައިވަނީ އެޑިޔުކޭޝަން މިނިސްޓްރީ އާއި އެމްއެންޑީއެފް ގުޅިގެންނެވެ.

ރަސްމިއްޔާތުގައި މިރިޕޯޓް ނެރެދެއްވީ އެޑިއުކޭޝަން މިނިސްޓަރު ޑރ. އައިޝަތު ޝިހާމް އާއި ޑިފެންސް މިނިސްޓަރު އާދަމް ޝަރީފް އުމަރު އެވެ.

މިރިޕޯޓް އެކުލަވާލުމަށް މާލެއިން މި އަހަރު 2151 ދަރިވަރުންނާއި އަތޮޅުތަކުން 4733 ދަރިވަރުންނާއެކު ޖުމްލަ 6884 ދަރިވަރުން ހެލްތް ސްރީން ކޮށްފައިވާ އިރު، މިއީ މިގްރޭޑްގައި ކިޔަވާ ދަރިވަރުން 91.9 އިންސައްތައެވެ.

މި ޕްރޮގްރާމުގެ ތެރެއިން އެންމެ ބޮޑަށް ފާހަގަކުރެވިފައިވަނީ ދަރިވަރުންނަށް ލޮލާއި ދަތުގެ މައްސަލަތައް ކުރިމަތިވެފައިވާ ނިސްބަތް އެހެން މައްސަލަތަކަށް ވުރެ އިތުރުވެގެން ގޮސްފައިވާ ކަމަށް ރިޕޯޓުން ފާހަގަވާކަމަށް އެޑިއުކޭޝަން މިނިސްޓްރީން ބުނެއެވެ.

އަދި ދަރިވަރުންގެ ބަރުދަން ބެލިއިރު ބައެއް ކުދިން މާބޮޑަށް ލުއިވެފައި ބައެއް ކުދިން މާބޮޑަށް ބަރުވެފައި ހުރިކަން ފާހަގަކުރެވުނު ކަމަށްވެސް އެ މިނިސްޓްރީން ބުންޏެވެ.