ލައިބްރަރީއިން ގެންދިޔަ ފޮތް ރައްދުކުރީ 82 އަހަރު ފަހުން

ލައިބްރަރީއަކުން އަނބުރާ ރައްދުކުރާގޮތަށް މީހަކު ފޮތެއް ގެންދިޔަތާ 82 އަހަރު ފަހުން، އެލައިބްރަރީއަށް ފޮތް އަނބުރާ ރައްދުކޮށްފިއެވެ.
އެމެރިކާގެ ސެން އެންޓޯނިއޯ ޕަބްލިކް ލައިބްރަރީ (އެސް.އޭ.ޕީ.އެލް) އިން ޖުލައި 1943 ގައި ނަގާފައިވާ ”ޔޯރ ޗައިލްޑް، ހިސް ފަމިލީ އެންޑް ފްރެންޑްސް“ ނަމަކަށް ކިޔާ މިފޮތް ދޫކޮށްފައިވަނި 28 ދުވަސް ފަހުން އަނބުރާ ރައްދުކުރާ ގޮތަށެވެ. ނަމަވެސް ފޮތް އަނބުރާ ގެނެސްފައި ވަނީ 2025 ވަނައަހަރުގެ ޖޫން މަހުގެ ތެރޭގައެވެ.
ފޮތް އަނބުރާ ގެނައިރު ރައްދުކުރަން އެހާ ލަސްވި ސަބަބު ބަޔާންކޮށް ފޮތާއެއްކޮށް ސިޓީއެއްވެސް ފޮނުވާފައިވެއެވެ. އޮރިގޮންގައި ދިރިއުޅޭ ފަރާތެއް ފޮނުވާފައިވާ އެސިޓީގައި ބުނެފައިވަނީ، ފޮތް ފެނިފައިވަނީ އޭނާގެ ބައްޕަ މަރުވުމުން ބައްޕަ ގެންގުޅު ތަކެތި ހޯދައި ބެލިބެލުމުން ކަމަށެވެ.
”މިފޮތަކީ ސެން އެންޓޯނިއޯ ޕަބްލިކް ލައިބްރަރީއިން ނަގާފައިވާ ފޮތެއްކަން އެނގުމުން އަނބުރާ ރައްދުކުރަން ނިންމީ“ ކަމަށް އެސިޓީގައި ބުނެފައިވެއެވެ. އަދި މިފޮތް ގެނެސްފައިވަނީ އޭނާގެ ބައްޕަގެ އުމުރުން 11 އަހަރުގައި އޭނާގެ މާމަކަމަށާއި، އޭގެ ފަހުން މެކްސިކޯގައި ހުންނަ ޔޫ.އެސް އެމްބަސީގައި މާމަ މަސައްކަތް ކުރިއިރު އެއޮފީހަށް ފޮތް ގެންދިޔައީ ކަމަށްވެސް ސިޓީގައި ބުނެފައިވެއެވެ.
”އަދި 82 އަހަރު ފަހުން ފޮތް މިއޮތީ އަހަރެންގެ އަތުގައި ބައްޕަގެ މުދާތަކާއެކުވެފައެވެ“ ސިޓީގައި ބުނެފައިވެއެވެ.
އަދި އެސް.އޢ.ޕީ.އެލްއިން ކޮށްދީފައިވާ ޚިދުމަތްތަކަށް ތަޢުރީފު ކުރަމުން ސިޓީގައި އިތުރަށް ބުނެފައިވަނީ ”ފޮތް އަނބުރާ ރައްދުކުރަން މިހާ ލަސްވުމުން ޖޫރިމަނާ ނުކުރާނެ ކަމަށް އުންމީދު ކުރާކަމަށާއި، ޖޫރިމަނާ ކުރިނަމަވެސް މާމައަށް އެޖޫރިމަނާ ދެއްކެން ނޯންނާނެ ކަމަށެވެ“
ލަހުން ރައްދުކުރާ ފޮތްތަކަށް އެސް.އޭ.ޕީ.އެލް އިން މިހާރު ޖޫރިމަނާ ނުނަގައެވެ. އެހެންނޫންނަމަ އެފޮތުގެ ޖޫރިމަނާ ފީއަކަށް 896.79 ޑޮލަރު އަރާނެ ކަމަށް އެލައިބްރަރީއިން ބުނެފައިވެއެވެ.

އިޝްތިހާރު