ވެލިދޫ އިސްރަށްވެހިން ސްކޭމްގެ މައްސަލަތަކުން ރައްކާތެރިކުރުވުމަށް މަޢުލޫމާތުދީފި

ނ. ވެލިދޫ އިސްރަށްވެހިން ސްކޭމްގެ މައްސަލަތަކުން ރައްކާތެރިކުރުވުމަށް މަޢުލޫމާތު ދިނުމުގެ ޙަރަކާތެއް ވެލިދޫ ޕޮލިސް ސްޓޭޝަނުން ކުރިއަށް ގެންގޮސްފި އެވެ.

އޮގަސްޓު 11 ވަނަ ދުވަހު ކުރިއަށް ގެންދިޔަ މި ޙަރަކާތަކީ ވެލިދޫ ކައުންސިލުން ކުރިއަށް ގެންދިޔަ އިސްރަށްވެހިންގެ ހަވީރުގައި ޕޮލިސް ސްޓޭޝަނުން ބައިވެރިވެ ކުރިއަށް ގެންދިޔަ ހަރަކާތެކެވެ.

އިޝްތިހާރު

އެގޮތުން، ޢާންމު ވަމުންއަންނަ ސްކޭމް މައްސަލަތަކާއި އެފަދަ ސްކޭމްތަކުން ރައްކާތެރިވާނެ ގޮތްތަކާ ގުޅޭގޮތުން މަޢުލޫމާތު ދީފައިވެ އެވެ. އަދި އޮޅުވާލައިގެން މަކަރާއި ހީލަތުން ފައިސާ ހޯދާ މީހުންގެ ޢަމަލުތައް ހުންނަ ގޮތްތައް ކިޔައިދީ އެފަދަ މައްސަލަތަކުން ރައްކާތެރިވާނެ ގޮތްތައް ކިޔައިދީފައިވެ އެވެ.

އޭގެ އިތުރުން، ޢުމުރުން ދުވަސްވީ މީހުންނަށް އަމާޒުކޮށްގެން ސްކޭމްތައް ހިންގަމުންދާތީ އެފަދަ ކަންކަމަށް ސަމާލުވެ ރައްކާތެރިވެތިބުމަށާއި ބެންކު އެކައުންޓުގެ މަޢުލޫމާތާއި އޯޓީޕީ ކޯޑު ޙިއްސާނުކުރުމަށް ނަސޭހަތްތެރިވެފައިވެ އެވެ. މި ޙަރަކާތުގައި ވެލިދޫގެ ގިނަ އިސްރަށްވެހިން ބައިވެރިވެފައިވެ އެވެ.