ޚަބަރު ފީތާ

ސައިޕްރަސްގެ ޖަންގަލީގައި ރޯވި އަލިފާންގަނޑު 4 މަރަށްފަހު ކޮންޓްރޯލް ކުރެވިއްޖެ

މިފަހުގެ ތާރީޚެއްގައި ސައިޕްރަސްގައި ހިނގި އަލިފާނުގެ އެންމެ ހިތާމަވެރި ހާދިސާ ކަމުގައިވާ އެޤައުމުގެ ޖަންގަލީގައި ރޯވި އަލިފާންގަނޑު ކޮންޓްރޯލް ކުރެވިފައިވާ ކަމަށް އެޤައުމުގެ ފޮރެސްޓްރީ ޑިޕާޓްމަންޓުން ބުނެފިއެވެ.

ބާރު ވަޔާއެކު ހަލުވިކަމާއެކު ފެތުރުނު މިއަލިފާނގަނޑު ރޯވެފައި ވަނީ ފާއިތުވި ހޮނިހިރު ދުވަހުއެވެ. ރޯވުމާއެކު އަލިފާނގަނޑު ވަނީ ޓްރޫޑޫސް ފަރުބަދައާއި އެސަރަހައްދުގެ އަވަށްތަކަށް ފެތުރިފައެވެ. އަލިފާންގަނޑު ކޮންޓްރޯލްކޮށްފައި ވަނީ ގްރީކާއި އިޒްރާއީލްގެ މަތިންދާބޯޓުތަކުން ފެން ޖަހައިގެންނެވެ.

ސައިޕްރަސްގެ ފަޔަރ ޑިޕާޓްމަންޓުގެ ފަރާތުން ބުނެފައި ވަނީ، އަލިފާންގަނޑު ކޮންޓްރޯލް ކުރެވިފައިވި ނަމަވެސް އަދިވެސް ރޯވެދާނެ ކަމުގެ ބިރު އޮތުމުން އެސަރަހައްދުގައި އަދިވެސް ގިނަ އަދަދެއްގެ ފަޔަރ ފައިޓަރުން ހަރަކާތްތެރި ވަމުންދާ ކަމުގައެވެ.

1960 ގައި ރިޕަބްލިކް އޮފް ސައިޕްރަސް ޤާއިމް ކުރި ފަހުން މިހާތަނަށް ދިމާވި އަލިފާނުގެ އެންމެ ނުރައްކާތެރި މިހާދިސާގައި 50 ގެ އަނދާ ހުލިވެ، ކަރަންޓު ލައިންތައް ހަލާކުވެ އަދި 10 އަވަށުން މީހުން ވަނީ ހުސްކުރަން ޖެހިފައެވެ. މިހާދިސާގައި ޖަންގައްޔާއި ދަނޑުބިންތައް ހިމެނޭހެން 55 އަކަކިލޯމީޓަރުގެ ސަރަހައްދެއް ވަނީ އަނދާފައެވެ. އަދި އަލިފާނުން ސަލާމަތްވާން އުޅުމުގެ ތެރޭގައި އޯޑޯސް އަވަށުން މިސްރުގެ 4 މަސައްކަތު މީހުން ވަނީ މިހާދިސާގައި މަރުވެފައެވެ.

މިހާދިސާގައި ގަސްދުގައި އަލިފާން ރޯކުރި ކަމުގެ ތުހުމަތުގައި 67 އަހަރުގެ ފިރިހެނަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ނަމަވެސް އޭނާ ވަނީ އެދައުވާއަށް އިންކާރު ކޮށްފައެވެ. މަންޒަރުދުށް ބައެއް މީހުން ބުނެފައިވާ ގޮތުގައި އަލިފާން ރޯވިވަގުތު އެހިސާބުން ކާރެއްގައި އެމީހާ ދަނިކޮށް ވަނީ ފެނިފައެވެ. ކުށް ސާބިތުވެއްޖެ ނަމަ ގަސްދުގައި 4 މީހުން މެރިކަމުގެ ހުކުމް އޭނާއަށް ކުރެވޭނެއެވެ.

އަލިފާންގަނޑު ކޮންޓްރޯލް ކުރުމަށް ފަޔަރ ފައިޓަރުންނާއި އަސްކަރިއްޔާގެ 600 އަށްވުރެ ގިނަ ފަރާތްތަކެއް ރެޔާއި ދުވާލު ވަނީ މަސައްކަތް ކޮށްފައެވެ.

Like
Like Love Haha Wow Sad Angry
2

މިލިޔުމަށް ޚިޔާލު ފޮނުވާ "ސައިޕްރަސްގެ ޖަންގަލީގައި ރޯވި އަލިފާންގަނޑު 4 މަރަށްފަހު ކޮންޓްރޯލް ކުރެވިއްޖެ"

ޚިޔާލު ފާޅުކުރައްވާ

އީމެއިލް އެޑްރެސް ހާމަ ނުކުރާނެ.