ރިސޯޓު ކުލި ޖޫރިމަނާ ލުއި ކޮށްދިނުމަށް އަންނަ ޖޫން 17 އާ ހަމަައަށް ހުށަހެޅޭނެ
ރިސޯޓު ކުލި ޖޫރިމަނާ ލުއި ކޮށްދިނުމަށް އަންނަ ޖޫން 17 އާ ހަމަައަށް ހުށަހެޅޭނެ ކަމަށް ޓޫރިޒަމް މިނިސްޓްރީން ބުނެފި އެވެ.
އެ މިނިސްޓްރީން ބުނީ ޓޫރިޒަމްގެ ބޭނުމަށް ދޫކޮށްފައިހުރި ރަށްތަކުގެ ތެރެއިން މަސައްކަތް ހުއްޓި، ބޮޑެތި އަދަަދުތަކުން ޖޫރިމަނާ ދައްކަން ޖެހިފައިވާ ކުންފުނިތަކަށް ލުއިތަކެއް އަނެއްކާ ވެސް ދީ އެކަމަށް އެދި ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
އެގޮތުން ޖޫރިމަނާ ލުއިކޮށްދިނުމަށް އެދި އަންނަ ޖޫން މަހުގެ 17 ވަނަ ދުވަހުގެ ނިޔަލަށް ހުށަހެޅޭނެ ގޮތް ހަމަޖައްސާފައިވާ ކަމަށް ބުނެއެވެ. އަދި މިދިޔަ ޑިސެމްބަރު މަހު މިނިސްޓްރީން ގެޒެޓްކޮށްފައިވާ ގަވައިދުގެ ދަށުން ކުލި ނުދެއްކުމުގެ ސަބަބުން ޖޫރިމަނާ ވެފައިވާ ތަންތަނަށް ތިން މަސް ދުވަހުގެ މުއްދަތެއް ދީފައިވީނަމަވެސް އަނެއްކާ ވެސް ވަނީ މުއްދަތު އިތުރުކޮށްދީފަ އެވެ.
ޓޫރިޒަމް މިނިސްޓްރީން ބުނީ މިގޮތަށް ނިންމީ ވީހާ ވެސް ގިނަ ބަޔަކަށް ލުއި ދިނުމުގެ ގޮތުން ކަމަށެވެ.
މިވަގުތު ޓޫރިޒަމް މިނިސްޓްރީން ރިސޯޓުގެ ގޮތުގައި ތަރައްގީކުރަން 115 ރަށެއްދީފައިވާ އިރު، މީގެ ތެރެއިން 70 ރަށެއްގެ މަސައްކަތް އޮތީ ހުއްޓި، މި ރަށްރަށުން ބޮޑެތި ޖޫރިމަނާތަަކެއް ދައްކަން ވަނީ ޖެހިފަ އެވެ.
ޓޫރިޒަމްް މިނިސްޓްރީން މިކަމުގައި އެކުލަވާއިލާފައިވާ ގަވައިދުގެ ދަށުން ކުލި ނުދައްކައިފި ނަމަ އަހަރެއްގެ މައްޗަށް 182 ޕަސެންޓް އިތުރަށް ފައިސާ ދައްކަން ޖެހެ އެވެ. ކުންފުނިތަކުން ރިސޯޓުގެ ކުލި ދައްކަން ޖެހެނީ ކޮންމެ ތިން މަހަކުންނެވެ. އަލަށް ދިން ލުޔާ އެކު ކުލި ދެއްކުން ލަސްވެއްޖެ ނަމަ ޖޫރިމަނާގެ ގޮތުގައި ދައްކަން ޖެހޭ އިތުރު 18 ޕަސެންޓެވެ. ޓޫރިޒަމް މިނިސްޓްރީން ބުނީ ކުލި ދެއްކުމުގެ ގަވައިދަށް އަލަށް ގެނައި އިސްލާހާ އެކު ޖޫރިމަނާ ނުދައްކާ ތިބި ފަރާތްތަކަށް 18 ޕަސެންޓް އިތުރަށް އަރާފައިވާ ބައި މައާފުކޮށްދޭނެ ކަމަށެވެ.
މިގޮތަށް ކުލިން މާފުކޮށްދޭނީ ކުރިއަށް އޮތް ތިން އަހަރުގެ ތެރޭގައި ރިސޯޓުގެ މަސައްކަތް ނިންމުމަށް ޝަރުތުކޮށްފަ އެވެ. އަދި ތިން އަހަރަށް ފަހު ވެސް ރިސޯޓު ހަދާ ނުނިމެއްޖެ ނަމަ އެގްރީމެންޓް ޓާމިނޭޓް ކުރާނެ ކަމަށް ޓޫރިޒަމް މިނިސްޓްރީން ބުނެފައިވެ އެވެ.
މިލިޔުން ކިޔާލުމުން
