އޭޕްރިލް މަހު ރާއްޖެއަށް އިމްޕޯޓް ކުރި މުދަލުގެ ސީ.އައި.އެފް އަގު 67 އިންސައްތަ އިތުރުވެއްޖެ
އޭޕްރިލް މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފް އަގު 67 އިންސައްތަ އިތުރުވެއްޖެ އެވެ.
މޯލްޑިވްސް ކަސްޓަމްސް ސަރވިސް އިން ބުނީ މިދިޔަ އަަހަރުގެ އޭޕްރިލް މަހު ދިވެހިރާއްޖެއަށް 1.8 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ އޭޕްރިލް މަހު މި ޢަދަދުވަނީ 3 ބިލިއަން ރުފިޔާއަށް އިތުރުވެފައި ކަމަށެވެ.
މީގެއިތުރުން، ފާއިތުވި އޭޕްރިލް މަހު ދައުލަތަށް ލިބުނު އާމްދަނީ 2020 ވަނަ އަހަރުގެ އޭޕްރިލް މަހާ އަޅާބަލާއިރު 101 އިންސައްތަ ވަނީ އިތުރުވެފައިވާ ކަަމަށް ވެސް ކަސްޓަމްސް އިން ބުނެއެވެ.
އެގޮތުން މިދިޔަ އަހަރުގެ އޭޕްރިލް މަހު 129 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ އޭޕްރިލް މަހު މި ޢަދަދުވަނީ 261 މިލިއަން ރުފިޔާއަށް އިތުރުވެފައި ކަމަށް ކަސްޓަމްސް އިން ބުންޏެވެ. އަދި މިއަހަރުގެ އޭޕްރިލް މަހު ރޯޔަލްޓީގެ ގޮތުގައި 4 މިލިއަން ރުފިޔާ ލިބިފައިވާ ކަމަށް ވެސް ބުންޏެވެ.
ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޔޫ.އޭ.އީ، އިންޑިއާ އަދި އޮމާން އެވެ.
ޔޫ.އޭ.އީ އިން 444 މިލިއަން ރުފިޔާގެ މުދާ އެތެރެކޮށްފައިވާއިރު، އިންޑިއާ އިން 411 މިލިއަން ރުފިޔާގެ މުދާ އަދި އޮމާން އިން 370 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ.
އިމްޕޯޓް/އެކްސްޕޯޓް ތަފާސް ހިސާބު – އޭޕްރިލް 2021
| ތަފްޞީލް | އޭޕްރިލް 2020 (ދިވެހި ރުފިޔާއިން) | އޭޕްރިލް 2021 (ދިވެހި ރުފިޔާއިން) | އިތުރުވި/ދަށްވި އިންސައްތަ |
| ދައުލަތަށް ލިބުނު އާމްދަނީ | 129 މިލިއަން | 261 މިލިއަން | 101% އިތުރު |
| އެކްސްޕޯޓް ކުރެވުނު މުދާ (އެފް.އޯ.ބީ އަގު) | 237 މިލިއަން | 174 މިލިއަން | 27% ދަށް |
| އިމްޕޯޓް ކުރެވުނު މުދާ (ސީ.އައި.އެފް އަގު) | 1.8 ބިލިއަން | 3 ބިލިއަން | 67% އިތުރު |
2021 އޭޕްރިލް މަހު އަގުގެގޮތުން އެންމެ ގިނައިން މުދާ އެތެރެކުރެވުނު އަދި ބޭރުކުރެވުނު ޤައުމުތައް
| އަގުގެގޮތުން އެންމެ ގިނައިން އިމްޕޯޓް ކުރި 5 ޤައުމު | އަގުގެގޮތުން އެންމެ ގިނައިން އެކްސްޕޯޓް ކުރި 5 ޤައުމު | ||
| ޔޫ.އޭ.އީ | 15% | ތައިލޭންޑް | 56% |
| އިންޑިއާ | 14% | އިންޑިއާ | 9% |
| އޮމާން | 13% | އިނގިރޭސިވިލާތް | 8% |
| ސިންގަޕޯރ | 11% | އެމެރިކާ | %6 |
| ޗައިނާ | 7% | ޖަރުމަނުވިލާތް | %4 |
2021 އޭޕްރިލް މަހު ޕްރޮސެސް ކުރެވުނު ޑިކްލަރޭޝަން އަދި ކްލިއަރެންސް ދެވިފައިވާ އުޅަނދުފަހަރުތަކުގެ ތަފާސް ހިސާބު
| ޕްރޮސެސްކުރެވުނު ޑިކްލަރޭޝަން | އޭޕްރިލް 2020 | އޭޕްރިލް 2021 |
| 4,465 | 16,476 |
| ކްލިއަރެންސް ދެވުނު އުޅަނދުފަހަރު | އޭޕްރިލް 2020 | އޭޕްރިލް 2021 |
| ރާއްޖެއިން ބޭރުން އައިސްފައިވާ އުޅަނދުފަހަރު | 62 | 115 |
| ރާއްޖޭއިން ފުރާފައިވާ އުޅަނދުފަހަރު | 84 | 132 |
މިލިޔުން ކިޔާލުމުން
