ކެންދޫ ދޮން ޔޫސުފް ޢުމުރުން 85 އަހަރުގައި އަވަހާރަވެއްޖެ
ބ. ކެންދޫ، މޯނިންގ ހައުސް، ޔޫސުފް ހުސައިން ނުވަތަ އެންމެން ދަންނަ ނަމުންނަމަ ކެންދޫ ދޮން ޔޫސުފް ޢުމުރުން 85 އަހަރުގައި މިއަދު އަވަހާރަވެއްޖެއެވެ.
ދިވެހި ބޭސްވެރިކަމުގައި ގާތްގަނޑަކަށް 60 އަހަރު ޚިދުމަތްކުރައްވާފައިވާ ދޮން ޔޫސުފް އަވަހާރަވި އިރު، އަންބަކާއި 7 ކުދިން ދުނިޔޭގައި އެބަތިއްބެވިއެވެ. އޭގެތެރޭގައި ކްރިމިނަލް ކޯޓުގެ ކުރީގެ އިސް ގާޟީ ޢަބްދުލްބާރީ ޔޫސުފް ހިމެނެއެވެ.
ޢާންމު ޚިދުމަތުގެ އިނާމާއި 2007 ވަނަ އަހަރު ޝަރަފުވެރިކަމުގެ އިނާމު ލިބިވަޑައިގެންފައިވާ ދޮން ޔޫސުފް ބޭސްކޮށްދެއްވާފައިވަނީ ހިލޭ ސާބަހަށެވެ.
ދޮން ޔޫސުފްގެ ބޭސްވެރިކަމުގެ ހަޔާތުގައި އޭނާގެ ފަރާތުން އެތައްބަޔަކަށް ބޭސްފަރުވާލިބި، ބައެއް މީހުން ބަލިން ފަސޭހަވެފައިވެސް އެބަހުއްޓެވެ. މީގެ އިތުރުން އޭނާވަނީ ބޭސްވެރިކަން ދަސްކޮށްދިނުމަށްވެސް މަސައްކަތް ކުރައްވާފައެވެ.
އޭނާ ދިވެހި ބޭސްވެރިކަން ދަސްކުރައްވާފައިވަނީ ބައްޕަ ކެންދޫ ހުސައިން އީސާގެ ފަރާތުންނާއި ބާޑީގެ މުހައްމަދު ދީދީގެ އަރިހުންނާއި އިބްރާހީމް ފާމުދޭރިކިލެގެފާނުގެ އަރިހުންނެވެ.
ރާއްޖެ ބައްޔަށް ބޭސްކުރެއްވުމުގައި މަޝްހޫރުކަމާއި ލޯބި ހޯއްދަވާފައިވީ ނަމަވެސް ހުރިހާ ވައްތަރެއްގެ ބޭހެއްވެސް އޭނާ ހެއްދެވިއެވެ.
މަރްހޫމްގެ ފުރަޔާނައަށް ސުވަރުގޭގެ ދާއިމީ ނިޢުމަތްލައްވާ، ޢާއިލާއަށް ކެތްތެރިކަން ދެއްވާށި. އާމީން
މިލިޔުން ކިޔާލުމުން
