ހައްޖަށް މީހުން ގެންދިއުމުގެ ހުއްދަ ކުންފުނިތަކަށް ދިން ގޮތާއިމެދު އެއްވެސް ޝަކުވާއެއް ހުށަނާޅާ: މިނިސްޓްރީ
މިއަހަރު ރާއްޖެއިން ހައްޖަށް މީހުން ގެންދިއުމުގެ ހުއްދަ ކުންފުނިތަކަށް ދިން ގޮތާއިމެދު އެއްވެސް ޝަކުވާއެއް ހުށަހަޅާފައިނުވާކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ މިނިސްޓަރ ޝާފިޢު ޢަލީ ވިދާޅުވީ އެކަމުގައި އަމަލުކުރީ ހާމަކަން ބޮޑުކޮށް ކަމަށެވެ. އަދި ހައްޖަށް ގެންދިއުމުގެ ހުއްދަ ދިން 5 ކުންފުންޏާ އެކު އެ މިނިސްޓްރީން މިއަދު އެއްބަސްވުމުގައި ސޮއިކޮށްފައިވާ ކަމަށެވެ.
ޝާފިޢު އިތުރަށް ވިދާޅުވީ އެކަން ކުރީ ނަޒާހަތްތެރިކަމާ އެކު ކަމަށާއި އެކަމުގައި އެއްވެސް ކަމެއް ސިއްރު ކުރުމުގެ ވިސްނުމެއްވެސް ނެތް ކަމަށެވެ.
އެހެންނަމަވެސް އޭނާ ވިދާޅުވީ ހައްޖަށް ގެންދިއުމުގެ ހުއްދަ ދިން ގޮތާ މެދު ކުންފުންޏަކުން ކޯޓަށް މައްސަލަ ހުށަހެޅިކަމުގެ މަޢުލޫމާތު ލިބިފައިވާ ކަމަށެވެ. އަދި އެފަދަ މައްސަލައެއް ހުށަހަޅާ ނަމަ، އޭގެ ފުރިހަމަ މަޢުލޫމާތު އެ މިނިސްޓްރީން ހޯދުމަށް ފަހު މައްސަލަ ހުށަހެޅުން މުހިންމު ކަމަށް ދެކޭ ކަމަށެވެ.
“ ހައްޖަށް ގެންދިއުމުގެ ހުއްދަ ދިނުމުގައި ޕޮއިންޓް ދޭނެ އުސޫލުތައް ކުރިންވެސް އިއުލާން ކޮށްފައިވާނެ. އެކަމުގަ އަމަލުކުރީ އެ އުސޫލުން “ ޝާފިޢު ވިދާޅުވިއެވެ.
އިސްލާމިކް މިނިސްޓްރީން މިހެން ބުނެފައިވާ އިރު، އެކަމުގައި ޢަމަލުކުރީ ގޯސްކޮށް ކަމަށް ބުނެ ސިސިލްފަރު ހައްޖު އެންޑް އުމްރާ ގްރޫޕުން ވަނީ އެ މިނިސްޓްރީއާ ދެކޮޅަށް ސިވިލް ކޯޓަށް އިއްޔެ މައްސަލައެއް ހުށަހަޅާފައެވެ.
މިލިޔުން ކިޔާލުމުން
