މަސްވެރިކަން ރަނގަޅު، އަގަށް ބަދަލެއް އަންނާނެކަމަކަށް ނުބެލެވޭ: މަސްވެރިން
މިދުވަސްވަރު ރާއްޖޭގެ މަސްވެރިކަން ރަނގަޅު ކަމަށާއި އެހެންކަމުން މާލޭގެ ބާޒާރުގައި އަގަށް ބަދަލެއް އަންނާނެކަމަކަށް ނުބެލެވޭކަމަށް މާރުކޭޓުގައި މަސްވިއްކާ ފަރާތްތަކުން ބުނެފިއެވެ.
އެމީހުން މިއަދު ހެނދުނު ބުނީ މަހުގެ އަގަށް ބަދަލުއަންނާނީ މަސްވެރިކަން ދަށްވެއްޖެނަމަ އެކަނި ކަމަށެވެ. އެހެންނޫންނަމަ، ރޯދަމަސް ނިމެންދެން މަހުގެ އަގު އެއްވަރެއްގައި ހިފެހެއްޓިފައި ހުންނާނެ ކަމަށްވެސް ބުންޏެވެ.
މިއަދު ހެނދުނު މާލޭ މަސް މާރުކޭޓުގައި މަސް ކިލޯއެއް ވިއްކަން ހުރީ ޢާންމުކޮށްވެސް ކިލޯއެއް ވިއްކާ އަގު ކަމަށްވާ 35ރ. އަށެވެ.
ކޮންމެ އަހަރެއްގެވެސް ރަމަޟާން މަހަކީ މަސް ގަންނަ މީހުން ގިނަ މަހެކެވެ. އެއީ، ރޯދަ ވިއްލުމަށާއި ތަރާވީސް އަދި ހާރުދަމަށް މަސް ބޭނުންކޮށްގެން ކޮންމެވެސް ކާއެއްޗެއް ތައްޔާރުކޮށްލުމަށެވެ.
ކަނޑުމަހާއި އެއްގޮތަށް ފަރުމަހަކީވެސް ރޯދަމަހަށް ވަރަށް ގިނަ މީހުން ގަންނަ ބާވަތެކެވެ.
އެގޮތުން ބާޒާރުގައި ކުޑަ ގިނި މަހެއް 30 ރުފިޔާއަށް ހުރި އިރު، ބޮޑު ގިނި މަހެއްގެ އަގަކީ 60 ރުފިޔާ އެވެ. ރޯދަމަހަށް އެންމެ ގިނަ ބަޔަކު ބޭނުންވާ މާނިޔާ މަސް 60 ރުފިޔާއަށް ލިބެން ހުރި އިރު، ރަތް މަހެއް ލިބެން ހުރީ 150ރ. އަށެވެ. އަދި ފާނައެއްގެ އަގަކީ 200ރ. އަށެވެ.
މިލިޔުން ކިޔާލުމުން
