އެއްއަތޮޅަކުން ގްރީން ޓެކްސް އެންމެ ގިނައިން ލިބުނީ މާލެ އަތޮޅުން

އެއްއަތޮޅަކުން ގްރީން ޓެކްސްގެ ގޮތުގައި އެންމެ ގިނައިން އާމްދަނީ ލިބުނީ މާލެ އަތޮޅުންކަމަށް ފިނޭންސް މިނިސްޓްރީން ބުނެފިއެވެ.

އެމިނިސްޓްރީން ޢާންމުކުރި ތަފާސްހިސާބުގައިވާގޮތުން މާލެ އަތޮޅުން (ކ. އަތޮޅުގެ ރިސޯޓު، ހޮޓާ، ގެސްޓްހައުސްތަކުން) 27.92 މިލިއަން ރުފިޔާ ގްރީން ޓެކްސްގެ ގޮތުގައި މީރާއަށް ވަނީ ދައްކާފައެވެ.

އިޝްތިހާރު

ދެވަނައަށް އެންމެ ގިނައިން ގްރީން ޓެކްސްގެ ގޮތުގައި އދ. އަތޮޅުން ދައްކާފައިވަނީ 9.8 މިލިއަން ރުފިޔާއެވެ. އަދި ތިންވަނައަށް އެންމެ ގިނައިން ގްރީން ޓެކްސް ދައްކާފައިވަނީ އއ. އަތޮޅުންނެވެ. އެ އަތޮޅުން ދައްކާފައިވަނީ 6.5 މިލިއަން ރުފިޔާއެވެ.

ފަތުރުވެރިން ބައިތިއްބާ ތަންތަނުގެ ތެރެއިން ރިސޯޓްތަކުން ފެބްރުއަރީމަހު ގްރީން ޓެކްސްގެ ގޮތުގައި 72 މިލިއަނަށްވުރެ ގިނަ ރުފިޔާ ލިބިފައިވެއެވެ. އަދި ހޮޓާތަކުން 1.9 މިލިއަނަށްވުރެ ގިނަ ރުފިޔާ ލިބުނު އިރު، ގެސްޓްހައުސްތަކުން 2.5 މިލިއަނަށްވުރެ ގިނަ ރުފިޔާ ލިބިފައިވެއެވެ.

ފިނޭންސް މިނިސްޓްރީގެ ތަފާސްހިސާބު ދައްކާގޮތުން ސަފާރީ އުޅަނދުތަކުން ގްރީން ޓެކްސްގެ ގޮތުގައި 2.9 މިލިއަނަށްވުރެ ގިނަ ރުފިޔާ ދައްކާފައިވެއެވެ.

ދިވެހިރާއްޖޭގެ ޓޫރިޒަމް ޤާނޫނުގައިވާގޮތުން ދިވެހިރާއްޖޭގައި ހިންގާ ޓޫރިސްޓުންނަށް ޚިދުމަތްދޭ ތަންތަނަށް އަންނަ ޓޫރިސްޓުން، ރެއަކަށް 6 ޑޮލަރު އަދި ގެސްޓު ހައުސްތަކުން ރެއަކަށް 3 ޑޮލަރުގެ ރޭޓުން ގްރީން ޓެކްސް ނަގަން ޖެހެއެވެ.

ގްރީން ޓެކްސް ނަގަން ފަށާފައިވަނީ 2016 ވަނަ އަހަރުގެ ތެރޭގައެވެ.

މި އަހަރުގެ ފެބްރުއަރީ މަހު ގްރީން ޓެކުހުގެ ގޮތުގައި 79 މިލިއަން ރުފިޔާ ވަނީ ލިބިފައެވެ. އަދި މިއަހަރުގެ ފުރަތަމަ މަހު ދައުލަތަށް ގްރީން ޓެކްސްގެ ގޮތުގައި 78.2 މިލިއަން ރުފިޔާ ލިބިފައިވާ އިރު މިއީ، 1.89 އިންސައްތަ އިތުރު ޢަދަދެކެވެ.