”ކޮޕައެމެރިކާ 2019“ ފުޓްބޯޅަ މުބާރާތް ބްރެޒިލްގައި އަންނަ ޖޫން މަހު ފަށަނީ

ދެކުނު އެމެރިކާ ސަރަހައްދުގެ އެންމެ ބޮޑު އަދި އެންމެ ޝަރަފުވެރި ފުޓްބޯޅަ މުބާރާތް ކަމުގައިވާ ”ކޮޕައެމެރިކާ 2019“ އަންނަ ޖޫން މަހުގެ 14 ވަނަ ދުވަހު ފަށާނެއެވެ.

ކޮންމެ ތިންއަހަރުން އެއްއަހަރު ބާއްވާ ކޮޕަ އެމެރިކާ ފުޓްބޯޅަ މުބާރާތް މިއަހަރުގެ ޖޫން މަހުގައި ފެށޭއިރު، މިފަހަރު މި މުބާރާއް ބާއްވަނީ ބްރެޒިލްގައެވެ. މިއީ ބްރެޒިލްގައި މިމުބާރާތް ބާއްވާ 5 ވަނަ ފަހަރުކަންވެސް ފާހަކޮށްލަންޖެހެއެވެ. އެންމެ ފަހުން 2016 ވަނަ އަހަރު ބޭއްވުނު މި މުބާރާތް ބޭއްވިފައިވަނީ އެމެރިކާގައެވެ.

އިޝްތިހާރު

ޖުމްލަ 12 ގައުމަކުން ބައިވެރިވެގެން ކުޅޭ މި މުބާރާތުގައި ވާދަކުރަނީ  ދެކުނު އެމެރިކާގެ 10 ގައުމާއި އޭޝިއާގެ 2 ގައުމެވެ. 2016 ވަނަ އަހަރު އެމެރިކާގައި ބޭއްވުނު މުބާރާތުގައި   16 ގައުމަކުން ވަނީ ވާދަކޮށްފައެވެ. މިފަހަރުވެސް 16 ގައުމު ބައިވެރިކޮށްގެން މި މުބާރާތް ކުރިޔައްގެންދިއުމަށް އެންމެ ފުރަތަމަ ވާހަކަ ދެކެވުނު ނަމަވެސް ފަހުން އެ ޚިޔާލް ބަދަލުކޮށް މިފަހަރުގެ މުބާރާތުގައި ވާދަކުރާނީ 12 ގައުމުކަމަށް ވަނީ ހަޖައްސާ ނިންމާފައެވެ. މި މުބާރާތް 16 ގައުމު ހިމަނައިގެން ކުރިޔައްގެންދިއުމަށް ވާހަ ދެއްކެވުނުއިރު، 16 ގައުމު ހަމަކުރުމަށް ފުރުސަތު ދިނުމަށް ނިންމާފައިވަނީ ޔޫރަޕްގެ ޗެމްޕިއަން ޕޯޗުގަލް އަދި ދުނިޔޭގެ ޗެމްޕިއަން ފްރާންސްއަށެވެ.

12 ގައުމު ހަމަކޮށްފައިވަނީ އޭޝިއާ ބައްރުން ދެ ގައުމާ އެކުގައެވެ. އޭޝިއާ ބައްރުން މިފަހަރު މި މުބާރާތުގައި ވާދަކުރަން ދައުވަތް ލިބިފައިވަނީ ޖަޕާނާއި އެންމެ ފަހުގެ އޭޝިއަން ކަޕް ޗެމްޕިއަން ޤަތަރަށެވެ. މީގެ ކުރިން މި ފުރުސަތު ދީފައިވަނީ އުތުރު އެމެރިކާ ބައްރުގެ ޓީމުތަކަށެވެ. އެހެން ނަމަވެސް މުބާރާތް އިންތިޒާމް ކުރާ ފަރާތުން އެންމެ ފަހު ވަގުތު ނިންމާފައިވައޭޝިއާ ބައްރުގެ ދެޓީމަށް މި ފުރުސަތުދިނުމަށެވެ. އެގޮތުން މިފަހަރު ”ކޮޕަ އެމެރިކާ 2019“ ފުޓްބޯޅަ މުބާރާތުގައި ވާދަކުރަން ހަމަޖެހިފައިވާ 12 ގައުމަކީ:

1 – ބްރެޒިލް

2 – އާޖެންޓީނާ

3 – ބޮލީވިއާ

4 – ވެނަޒުއެލާ

5 – ޕެރޫ

6 – ކޮލަމްބިއާ

7 – ޕެރަގުއާއި

8 – ގަތަރު

9 – އުރުގުއާއި

10 – އިކުއެޑޯ

11 – ޖަޕާން

12 – ޗިލީ

މި މުބާރާތް ކުރިޔައްދާނީ މި މުބާރާތުގައި ވާދަކުރާ 12 ގައުމު 3 ގުރޫޕަކަށް ބަހާލައިގެންނެވެ.  އެގޮތުން މުބާރާތުގެ  ކުއާޓާ ފައިނަލަށްދާނީ ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމެވެ.

މިފަހަރުގެ މި މުބާރާތް ކުރިޔަށްދާނީ ޖޫން 14 އިން ޖުލައި 7 ހެ ނިޔަލަށެވެ.

ކޮޕައެމެރިކާ ފުޓްބޯޅަ މުބާރާތުގެ އެންމެ ކާމިޔާބު ޓީމަކީ އަދި އެންމެ ގިނަފަހަރު މި މުބާރާތުގެ ތަށި އުފުލާލާފައިވަނީ އުރުގުއޭއެވެ. އުރުގުއޭ މި މުބާރާތް 15 ފަހަރު ކާމިޔާބުކޮށްފައިވާއިރު، ދެވަނަ އަށް މި މުބާރާތް އެންމެ ގިނައިން ކާމިޔާބުކޮށްފައިވަނީ އާޖެންޓީނާއެވެ. އާޖެންޓީނާ ވަނީ މި މުބާރާތް 14 ފަހަރު ކާމިޔާބުކޮށްފައެވެ. ބްރެޒިލް މި މުބާރާތް ކާމިޔާބުކޮށްފައިވަނީ 8 ފަހަރުއެވެ.