ޓީޓީ އިން ރާއްޖެއަށް ފުރަތަމަ ގޯލްޑް މެޑެލް..

ޓޭބަލް ޓެނިސް (ޓީޓީ) ގައި ރާއްޖެއަށް މިހާތަނަށް ލިބުނު ފުރަތަމަ ގޯލްޑް މެޑެލް ސައުތު އޭސިއާ ހޯޕް ޓީޓީ އިވެންޓުގައި ހޯދައިފިއެވެ.

މި ރަން ވަނަ ރާއްޖެއަށް ހޯދައިދިނީ މި މަހުގެ 22ން 27އަށް އިންޑިއާގެ ހަރިޔާނާގައި ކުރިއަށްދިޔަ މި އިވެންޓުގައި ފާތުމަތު ދީމާ ޢަލީ އެވެ.

އިޝްތިހާރު

އިންޓަރނޭޝަނަލް ޓޭބަލް ޓެނިސް ފެޑެރޭޝަނުން ސަރަޙައްދުގެ ޤައުމުތަކުގެ 12 އަހަރުންދަށުގެ ކުޅުންތެރިންނަށް އަމާޒުކޮށްގެން ކޮންމެއަހަރަކުވެސް ބާއްވަމުން އަންނަ މި އިވެންޓުގެ އަންހެންކުދިންގެ ކެޓަގަރީން ދީމާ ރާއްޖެއަށް ރަންމެޑެލް ހޯދައިދިނީ ކުޅުނު ހުރިހާ މެޗެއްވެސް ކާމިޔާބުކޮށްގެންނެވެ.

ދީމާއަކީ ލަންކާއަށް އުފަން ކުއްޖެކެވެ. އަދި އޭނާވަނީ ލަންކާގައިވެސް ގިނަ ކާމިޔާބީތަކެއް ހޯދާފައެވެ. އެހެންކަމުން ލަންކާ ޤައުމީ ޓީމަށް ކުޅެންވެސް އޭނާއަށް ވަނީ ދަޢުވަތު ލިބިފައެވެ. ނަމަވެސް އޭނާގެ މަންމަ އާއި ބައްޕަ ނިންމީ ރާއްޖެއަށް ކުޅުވާށެވެ.

ދިވެހިރާއްޖެއަށް ދީމާ މިހޯދައިދިން ކާމިޔާބީއަށް އެޓޯލްނިއުސްގެ ހުރިހާ މުވައްޒަފުންގެ ނަމުގައި ތަހުނިޔާ އާއި މުބާރާކްބާދީ ދަންނަވަމެވެ.