އެމްޑީޕީ މަޖިލީސް ޕްރައިމަރީގެ ވޯޓުލުން ފެށިގެން ފޯރިޔާ އެކު ކުރިޔައް ދަނީ

މިއަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕާޓީ ޕްރައިމަރީގެ ވޯޓުލުން ރާއްޖޭގެ އެކިކަންކޮޅުތަކުގައި ފަށައިގެން ކުރިއަށް އެބަދެއެވެ.

އެމްޑީޕީގެ ޕްރައިމަރީގެ ވޯޓުލުން ރާއްޖޭގެ އެކިކަންކޮޅުތަކުގައި ހުކުރު ދުވަހުގެ 2:30 ގައި ފަށާފައިވާއިރު ވޯޓުލުން ނިއްމުމަށް ހަމަޖެހިފައިވަނީ މިރޭ 08:30 ގައެވެ. މި އިންތިޚާބުގައި ޖުމުލަ 77 ދާއިރާއަކުން 279 ކެންޑިޑޭޓުން ވާދަކުރެއެވެ.

އިޝްތިހާރު

ޕްރައިމަރީގައި 270 ވޯޓް ފޮށި ބަހައްޓާފައިވާއިރު ރާއްޖެއިން ބޭރުގައި ތިން ވޯޓް ފޮއްޓެއް ވަނީ ބަހައްޓާފައެވެ. އެއީ އަވަށްޓެރި ސްރީ ލަންކާ އާއި އިންޑިއާގެ އިތުރުން ގިނަ އަދަދެއްގެ ދިވެހިން ދިރިއުޅޭ މެލޭޝިއާއެވެ. މިހާރު މި ގައުމުތަކުގައި ވެސް ވޯޓްލުން ފަށައިގެން ކުރިއަށްދެއެވެ.

އެމްޑީޕީ އިން މައުލޫމާތު ދޭ ގޮތުގައި މި ޕްރައިމަރީގައި 270 ވޯޓު ފޮށި ބަހައްޓާފައިވޭ. ޕްރައިމަރީގައި 279 ކެންޑިޑޭޓުން ވާދަ ކުރާއިރު، ވޯޓުލުމުގެ ޙައްޤު 86،091 މީހުންނަށް ލިބިފައިވޭ.