އަތޮޅު ކައުންސިލްތައް އުވާލަން ރައީސް ނިންމަވައިފި
ކުރިއަށް އޮތް ލޯކަލް ކައުންސިލް އިންތިހާބަށް ވޯޓު ލުމުގެ ކުރިން އަތޮޅު ކައުންސިލްތައް އުވާލަން ނިންމާފައިވާ ކަމަށް ރައީސުލް ޖުމްހޫރިއްޔާ ޑރ. މުހައްމަދު މުއީޒު ވިދާޅުވެއްޖެއެވެ.
މިކަން ހާމަކޮށްފައިވާނީ އަންގާރަ ދުވަހުގެ ރޭ އއ. މަތިވެރީ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ. ރައީސް ވިދާޅުވީ އަތޮޅު ކައުންސިލަކީ އެއްވެސް ބޭނުމެއް އޮތް އެއްޗެއް ނޫން ކަން ކޮންމެ ރަށެއްގެ ރަށު ކައުންސިލް މިކަމަށް ހެކިވާނެ ކަމަށެވެ.
އެގޮތުން އަތޮޅު ކައުންސިލްތައް އުވާލުމަށް ގާނޫނު އަސާސީ އިސްލާހުކުރާނެ ކަމަށާއި މަޖިލީހުގެ ޖަލްސާތައް ދެން ފެށުމުން އެކަމާ ގުޅޭ ބިލު ހުށަހަޅުއްވާނެ ކަމަށް ރައީސް ވިދާޅުވި އެވެ.
އަދި އަތޮޅު ކައުންސިލްތައް އުވާލުމުގެ އިތުރުން، ކައުންސިލްތަކުގެ ސައިޒު ކުޑަކުރުމާ ގުޅޭ ބިލުވެސް މަޖިލީހުގެ ކުރިއަށް އޮތް ދައުރަށް ހުށަހަޅުއްވާނެ ކަމަށް ރައީސް ހާމަކުރެއްވިއެވެ.
މިގޮތުން، 2,000 މީހުންނަށްވުރެ މަދު އާބާދީތަކުގައި ތިން ކައުންސިލަރުންނާއި، 2,000 އަށްވުރެ ގިނަ އާބާދީތަކުގައި 5 ކައުންސިލަރުން ތިބޭގޮތަށް ހަމަޖެއްސުމަށް ގާނޫނު އަސާސީ އިސްލާހު ކުރައްވާނެ ކަމަށް ރައީސް ވިދާޅުވިއެވެ
މިލިޔުން ކިޔާލުމުން
