އީސީގެ މެންބަރުކަމަށް ހަސަން އައްޔަން ކުރަން ފާސްކޮށްފި
އިލެކްޝަންސް ކޮމިޝަން (އީސީ) ގެ މެންބަރު ކަމަށް އެ ކޮމިޝަންގެ ސެކްރެޓަރީ ޖެނެރަލްގެ މަގާމުގައި ހުންނެވި ހަސަން ޒަކަރިއްޔާ އައްޔަނުކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
އީސީގެ މެންބަރަކު ކަަމަށް ހަސަންގެ ނަން މަޖިލީހުން މިއަދު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 39 މެންބަރުންގެ އިއްތިފާގުންނެވެ.
އީސީގެ މެންބަރު ކަމުގެ ދައުރަކީ ފަސް އަހަރެވެ. އީސީގެ މެމްބަރު ކަމަށް ހަސަން ޒަކަރިއްޔާ އައްޔަންކުރަން މަޖިލީހުގެ ރުހުން ހޯއްދެވުމަށް ފޮނުއްވީ ކޮމިޝަނުގެ ނައިބު ރައީސްގެ މަގާމުގައި އޭރު ހުންނެވި އިސްމާއިލް ހަބީބުގެ ދައުރު ހަމަވާތީ އޭނާގެ ބަދަލުގައެވެ.
ގާނޫނުގައިވާ ގޮތުން އީސީގެ މެންބަރު ކަމުގައި ފުރިހަމަ ކުރެވޭނީ ގިނަވެގެން ދެ ދައުރު ކަމަށް ވާއިރު، އިސްމާއީލް ހަބީބު އެ ކޮމިޝަނުން ވަކިވެވަޑައިގަތީ، ކޮމިޝަންގެ މެމްބަރު ކަމުގައި ދެ ދައުރު ހަމަވުމުންނެވެ. އޭނާ ވަނީ 21 އަހަރު ދުވަހު އެ ކޮމިޝަނަށް ޚިދުމަތް ކޮށްދެއްވާފައެވެ.
ކޮމިޝަންގައި މިހާރު ތިއްބަވަނީ ކޮމިޝަންގެ ރައީސް ފުއާދު ތައުފީގާއި ނައިބު ރައީސް އަލީ ނަޝާތާއި ޑރ. މުހައްމަދު ޒާހިރުގެ އިތުރުން މުހައްމަދު އާސިފެވެ.
މިލިޔުން ކިޔާލުމުން
