މަކުނުދޫގައި މަރުވި ދެ މީހުންގެ ހަށިގަނޑު ތަހުލީލަށް މާލެ ގެންނަނީ

ހދ. މަކުނުދޫގައި ގޭސްފުޅިއެއް ގޮވައިގެން ހިނގި ހާދިސާގައި މަރުވި ދެ މީހުންގެ ހަށިގަނޑު މާލެ ގެނައުމުގެ މަސައްކަތް ކުރަމުން އަންނަ ކަމަށް ފުލުހުން ބުނެފިއެވެ.

މި ހާދިސާގައި މަރުވެފައި ވަނީ މަކުނުދޫ އެއާޕޯޓު އަޅަން ބޭނުންވާ ބިން ހިއްކުމާއި ގޮނޑުދޮށް ހިމާޔަތް ކުރަން ކުރިއަށްގެންދާ މަޝްރޫއުގައި މަސައްކަތްކުރަމުން ދިޔަ ދެ ބިދޭސީ ފިރިހެނުންނެވެ. އެ ދެ މީހުންނަކީ ވެސް އިންޑިއާއަށް ނިސްބަތްވާ ދެ މީހުންނެވެ. އެ ދެ މީހުންގެ ހަށިގަނޑަށް ބޮޑެތި ގެއްލުންތަކެއް ލިބިފައިވާއިރު، ހަށިގަނޑު ޗިސްޗިސްވެ، ބައެއް ބައިތައް ވަނީ ދުރަށް ބުރައިގެން ގޮސްފައެވެ.

އިޝްތިހާރު

ފުލުހުން ބުނީ ފުލުހުންގެ ތަހުގީގުގެ ތެރެއިން ބަލަން ޖެހޭ ކަންކަން ބެލުމަށް އެ ދެ މީހުންގެ ހަށިގަނޑު މާލެ ގެންނަން ނިންމާފައި ވާ ކަމަށާއި، ހަށިގަނޑަށް ދެން ހަދާނެ ގޮތެއް ނިންމާނީ ކުރަން ޖެހޭ ތަހުލީލުތަކަށް ފަހު ކަމަށެވެ.

އެނގިފައިވާ ގޮތުގައި އެ ދެ މީހުންގެ ހަށިގަނޑު އާއިލާއާ ހަވާލު ކުރަން ވަނީ އެދިފައެވެ.

މި ހާދިސާ ތަހުގީގު ކުރުމަށް ކުޅުދުއްފުށިން ފޮރެންސިކް ޓީމަކާއި ތަހުގީގު ޓީމެއް އެ ރަށުގައި ހަރަކާތްތެރި ވަމުން އަންނައިރު، އެމްއެންޑީއެފުން ވެސް އަންނަނީ ފުލުހުންނާ ގުޅިގެން އެ ހާދިސާ ތަހުގީގު ކުރަމުންނެވެ.