ނުރަސްމީ ތަޢުލީމު ރަށު ފެންވަރަށް ބަދަލުވުމުން އެކަމަށް ދެވޭ ސަމާލުކަން އިތުރުވޭ: ވަޒީރު
ނުރަސްމީ ތަޢުލީމު ރަށު ފެންވަރަށް ބަދަލުވުމުން އެކަމަށް ދެވޭ ސަމާލުކަން އިތުރުވާކަމަށް ތަޢުލީމާއިބެހޭ ވަޒީރު ޑރ. ޢައިޝަތު ޢަލީ ވިދާޅުވެއްޖެއެވެ.
އެކަމަނާ ވިދާޅުވީ ތަޢުލީމާ ބެހޭ މިނިސްޓްރީގެ މަސައްކަތްތައް ލާމަރުކަޒީ ކުރުމުގެ ތެރޭގައި ބޮޑެތި މީހުންގެ ނުރަސްމީ ތަޢުލީމު ކައުންސިލްތަކަށް ބަދަލުކުރުންވެސް ހިމެނޭ ކަމަށެވެ. އަދި ނުރަސްމީ ތަޢުލީމު ރަށު ފެންވަރަށް ބަދަލުވުމުން އެކަމަށް ދެވޭ ސަމާލުކަން އިތުރުވާ ކަމަށެވެ.
މީގެ އިތުރުން ރައްޔިތުން ބޭނުންވާ ހުނަރުތައް ގާތުން ފޯރުކޮށްދިނުމަށް މަގު ފަހިވާނެ ކަމަށާއި މި ތައުލީމަށް އައު ރޯޝަންކަމެއް އަންނާނެ ކަމަށްވެސް ވަޒީރުު ވިދާޅުވިއެވެ.
މިމޭރުމުން ވާހަކަ ދައްކަވަމުން ވަޒީރު އިތުރަށް ވިދާޅުވީ އަތެއްގެ ހުރިހާ އިނގިލިތައް އެއްވަރު ނުވާފަދައިން ހުރިހާ ދަރިވަރުންނަކީ ނަފްސާނީ ގޮތުންނާއި ޖިސްމާނީގޮތުން ހަމަހަމަ ކުދިންނެއް ނޫން ކަމަށެވެ.
“ދަރިވަރުންގެ ތަފާތުތައް ދެނެގަނެ، ކޮންމެ ކުއްޖަކަށް ބޭނުންވާ އަޅާލުންތެރިކަން ދީގެން، ހުރިހާ ކުދިން ހިމެނޭގޮތުން، ދެވޭ ތަޢުލީމަށް މިހާރަކަށް އައިސް ކިޔަނީ އިންކްލޫސިވް އެޑިޔުކޭޝަން. މި ނިޒާމް މިހާރަށް ވުރެ ފުރިހަމަ ކުރުމަށްޓަކައި ވަކި ޑިވިޜަނެއް މި ވުޒާރާގައި އުފައްދައި، ސަފުން އިތުރު ސަމާލުކަމެއް، މި ނިޒާމް ފުރިހަމަ ކުރުމަށް ދޭނެ ވާހަކަ ދަންނަވާލަން” ވަޒީރު ވިދާޅުވިއެވެ.