ކޮޕަ އެމެރިކާގެ އެންމެފަހުގެ ޗެމްޕިއަން ޗިލީން ފެށުން ރަނގަޅުކޮށްފި

ކޮޕަ އެމެރިކާ ފުޓްބޯޅަ މުބާރާތުގެ އެންމެފަހުގެ ޗެމްޕިއަން ޗިލީ ކުޅުނު ފުރަތަމަ މެޗު ކާމިޔާބުކޮށް ފެށުން ރަނގަޅުކޮށްފިއެވެ.

ބްރެޒިލްގައި ކުޅޭ މި މުބާރާތުގައި ރޭ ފަތިހު ކުޅުނު ފުރަތަމަ މެޗު ޗިލީއިން ކާމިޔާބުކުރީ ޖަޕާނާއި ވާދަކޮށް 0-4ގެ ނަތީޖާއަކުންނެވެ.

އިޝްތިހާރު

ސައުޕޯލޯގެ މޮރެމްބީ ސްޓޭޑިއަމްގައި ކުޅުނު މި މެޗްގެ ފުރަތަމަ ހާފުގައި ދެ ޓީމުންވެސް އެޓޭކިންގ ގޭމެއް ކުޅުނު އިރު، ޗިލީން ވަނީ ގިނަ ޙަމަލާތަކެއްވެސް ފއިދިކޮޅު ގޯލަށް ފޮނުވާލާފައެވެ.

މެޗުގެ ފުރަތަމަ ލަނޑު 41 ވަނަ މިނެޓުގައި ޖަހައިދިނީ މިޑްފީލްޑަރ އެރިކް ޕުލްގަރ އެވެ.

ދެވަނަ ހާފުގައިވެސް ވަރުގަދަ ކުޅުމެއް ފެނިގެންދިޔައެވެ. އަދި ޗިލީގެ ދެވަނަ ލަނޑު ޖަހާ ލީޑު ފުޅާކުރީ ފަހު ހާފު ފެށިގެން 54 ވަނަ މިނެޓުގައެވެ. މި ލަނޑު ޗިލީއަށް ކާމިޔާބުކޮށްދިނީ ވާގާސްއެވެ.

ޗިލީގެ ތިންވަނަ ލަނޑު މެޗުގެ 82 ވަނަ މިނެޓުގައި ފޯވަރޑް އެލެކްސިލް ސަންޗޭޒް ޖަހައިދިން އިރު، 83 ވަނަމިނެޓުގައި ޗިލީގެ 4 ވަނަ ލަނޑު ޖެހީ ސަންޗޭޒްގެ ޕާހަކުން ވާގާސް އެވެ.

މި މުބާރާތް ދެފަހަރެއްގެ މަތިން ކާމިޔާބުވެސް ކޮށްފައިވާ ޗިލީ މިއީ މި މުބާރާތުގައި ވާދަކުރާ 39 ވަނަ ފަހަރެވެ.

މިރޭ ކުޅޭ ފުރަތަމަ މެޗުގައި ބޮލީވިއާ އާއި ޕެރޫ ވާދަކުރާ އިރު، ދެވަނަ މެޗުގައި ވާދަކުރާނީ ބްރެޒިލް އާއި ވެނެޒުއޭލާއެވެ.