ކޮލަމްބިއާއިން ވަރުގަދަ އާޖެންޓީނާ ބަލިކުރި އިރު، ޕެރޫ އާއި ވެނެޒުއޭލާއަށް ހަމަހަމަނިމުމެއް
ބްރެޒިލްގައި މިހާރު ކުރިއަށްދާ ކޮޕަ އެމެރިކާ ފުޓްބޯޅަ މުބާރާތުގައި ވަރުގަދަ އާޖެންޓީނާގެ މައްޗަށް 0-2 ލަނޑުން ކުރިހޯދާ ގިނަބަޔަކު ހައިރާންކޮށްލައިފިއެވެ.
ގްރޫޕް ބީގައި ހިމެނޭ މި ދެޓީމުގެ މެޗުގައި ފުރަތަމަ ހާފު ނިމުނީ އެއްވެސްޓީމަކަށް ގޯލެއް ކާމިޔާބު ނުކުރެވިއެވެ.
އެހެންނަމަވެސް ފޮންޓެ ނޯވާ އެރޭނާގައި ކުޅުނު މި މެޗުގެ ފުރަތަމަ ލަނޑު 71 ވަނަ މިނެޓުގައި ޖަހައިދިނީ ރޮޖަރ މާޓިނޭޒްއެވެ. އަދި ދެވަނަ ލަނޑު 86 ވަނަ މިނެޓުގައި ޖަހައިދިނީ ޑްވާން ޒަޕަޓާއެވެ.
މި މުބާރާތުގައި ރޭ ކުޅުނު ދެވަނަ މެޗުގައި ބައްދަލުކުރީ ވެނެޒުއޭލާ އާއި ޕެރޫ އެވެ.
ބަލާހިތްވާ ކުޅުމެއް ފެނުނު މި މެޗުގައި ދެޓީމަށްވެސް ލަނޑުޖަހާނެ ފުރުޞަތުތައްލިބުނުނަމަވެސް އެރޭނާ ޑެ ގްރެމިއޯ ސްޓޭޑިއަމްގައި ކުޅުނު މެޗު ނިމުނީ އެއްވެސް ޓީމަކަށް ލަނޑެއްނުޖެހިއެވެ.
ކޮޕަ އެމެރިކާ ފުޓްބޯޅަ މުބާރާތުގައި މިރޭވެސް ދެމެޗު ކުޅޭނެއެވެ. ފުރަތަމަ މެޗުގައި މިރޭ 12ޖަހާ އިރު، ބައްދަލުކުރާނީ ޕެރަގުއޭ އާއި ޤަތަރެވެ. އަދި ދަންވަރު 3 ޖަހާ އިރު ބައްދަލުކުރާނީ އުރުގުއޭ އާއި އިކުއޭޑޯއެވެ.