އެމެރިކާގެ ވެކްސިން ރާއްޖެއަށް ފޯރުކޮށްދިނުމަށް ނިންމުމުން ރައީސް ސޯލިހުގެ ޝުކުރު އެމެރިކާގެ ރައީސްއަށް

އެމެރިކާއިން ކޮވިޑް ވެކްސިން ފޯރުކޮށްދޭ ފުރަތަމަ ގައުމުތަކުގެ ތެރޭގައި ރާއްޖެ ހިމެނުމާއިގުޅިގެން އެމެރިކާގެ ރައީސް ޖޯ ބައިޑަންއަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، ޝުކުރު އަދާކުރައްވައިފި އެވެ.

ރައީސް ސޯލިހު ކުރައްވާފައިވާ ޓްވީޓެއްގައި ވިދާޅުވީ އެމެރިކާއިން ކޮވިޑް ވެކްސިން ފޯރުކޮށްދިނުމުގެ ޕްރޮގްރާމުގައި ރާއްޖެ ހިމެނިގެންދިއުމަކީ އުފާކުރައްވާ ކަމެއް ކަމަށެވެ. އަދި އެކަމަށްޓަކައި ރާއްޖޭގެ ރައްޔިތުންގެ ފަރާތުން އެގައުމުގެ ރައީސް ބައިޑަން އާއި އެގައުމުގެ ރައްޔިތުންނަށް ޝުކުރު އަދާކުރައްވާ ކަމަށެވެ.

އިޝްތިހާރު

މީގެއިތުރުން އެމެރިކާއިން ކޮވިޑް ވެކްސިން ފޯރުކޮށްދިނުން ވެގެންދާނީ، ކޮވިޑުގެ ބައްޔާއިދެކޮޅަށް ކުރެވޭ ހަނގުރާމައަށް ލިބިގެންދާނެ ވަރަށް ބޮޑު ލުޔަކަށް ކަމަށް ވެސް ރައީސް ސޯލިހު ވިދާޅުވެފައި ވެއެވެ.

I convey the gratitude of the Maldivian people to President @JoeBiden and the American people for including Maldives in the new US global covid vaccine sharing program. Donated vaccine doses from the US are highly welcome in the fight against covid.

— Ibrahim Mohamed Solih (@ibusolih) June 3, 2021

އެކަމާ ގުޅިގެން ރާއްޖޭގެ ފޮރިން މިނިސްޓަރު އަބްދުﷲ ޝާހިދުވެސް ވަނީ ވަނީ ޓުވީޓެއް ކުރައްވާފަ އެވެ.

މިނިސްޓަރު ވިދާޅުވީ އެމެރިކާއިން ކޮވިޑް ވެކްސިން ފޯރުކޮށްދޭ ފުރަތަމަ ގައުމުތަކުގެ ތެރޭގައި ރާއްޖެ ހިމެނުމަކީ ދެގައުމުގެ ދެމެދުގައި އޮތް ގާތް ގުޅުމުގެ ރަމްޒެއް ކަމަށެވެ.

The US Government's announcement to include Maldives among the first countries to receive COVID-19 vaccines from USA is testament to our trusted and close partnership. I thank the Government of US and Secretary @ABlinken for this essential aid, at this critical juncture.

— Abdulla Shahid (@abdulla_shahid) June 3, 2021

އެމެރިކާގެ ކޮވިޑު ވެކްސިން ރާއްޖެއަށް ފޯރުކޮށްދޭނެކަން އިއުލާންކޮށްފައިވާ އިރު، އެގައުމުން ހަދިޔާކުރި ޕީޕީއީ އާއި މެޑިކަލް އިކުއިޕްމަންޓް ރަސްމީކޮށް ރާއްޖެއަށް ހަވާލުކުރުން މިއަދު އޮންނާނެ ކަމަށް ވަނީ މަޢުލޫމާތު ލިބިފަ އެވެ.

އެމެރިކާއިން ދުނިޔޭގެ ގައުމުތަކަށް ވެކްސިން ފޯރުކޮށްދޭން ނިންމެވިކަން އެގައުމުގެ ރައީސް ބައިޑަން މިއަދު ވަނީ އިއުލާން ކުރައްވައިފައެވެ. އެގޮތުން ރާއްޖެ ހިމެނޭހެން އޭޝިޔާ ސަރަހައްދަށް ހަތް މިލިއަން ޑޯޒްގެ ވެކްސިން ފޯރުކޮށްދޭނެކަމަށް އެމެރިކާއިން ވަނީ އިއުލާންކޮށްފައެވެ.