އެޑިޔުކޭޝަން މިނިސްޓަރ ފާދިއްޕޮޅަށް ވަޑައިގެންފި
އެޑިއުކޭޝަން މިނިސްޓަރ ޑރ. އައިޝަތު ޝިހާމް ފާދިއްޕޮޅަށް (ޅ އަތޮޅު) ވަޑައިގެންފިއެވެ.
އެކަމަނާގެ މި ދަތުރުފުޅަކީ މި ސަރުކާރުގެ ތަޢުލީމީ ސިޔާސަތު ހާމަކުރައްވާ، އެކަމާއިބެހޭ މަޢުލޫމާތު ހިއްސާކުރެއްވުމަށް ކުރައްވާ ދަތުރުފުޅެކެވެ.
ދެ ދުވަހުގެ މުއްދަތަށް ކުރައްވާ މި ދަތުރުފުޅުގައި އެ އަތޮޅުގެ ހުރިހާ ސްކޫލަކަށް ޒިޔާރަތްކުރެއްވުމަށް ނިންމަވާފައިވާ އިރު، އެކަމަނާ މިއަދު ޒިޔާރަތް ކުރައްވާފައިވަނީ ކުރެންދޫގައި ހުންނަ ޅ. އަތޮޅު މަދަރުސާ އަށާއި ނައިފަރުގައި ހުންނަ މަދަރުސަތުލް އިފްތިތާހަށެވެ. އަދި މާދަމާ ވަޑައިގަންނަވާނީ ހިންނަވަރުގައި ހުންނަ އެ އަތޮޅު ތަޢުލީމީ މަރުކަޒަށާއި އޮޅުވެލިފުށީ މަދަރުސާއަށެވެ.
މިނިސްޓަރ ގެ މި ދަތުރުފުޅުގައި މިއަދު ވަނީ މަދަރުސަތުލް އިފްތިތާހްގެ ސްމާޓް ކްލާސް އިފްތިތާހު ކުރައްވާފައެވެ.
މިނިސްޓަރ ގެ މި ދަތުރުފުޅުގައި ސްކޫލްތަކުގެ ސީނިއަރ މެނޭޖްމަންޓާއި ޓީޗަރުންނާއި ސްކޫލް ބޯޑާއި ޕީޓީއޭ ހިންގާ ކޮމިޓީގެ ބޭފުޅުންނާއި ރަށު ކައުންސިލުގެ ބޭފުޅުންނާއި ބައްދަލުކުރައްވާނެއެވެ.
މި ބައްދަލުކުރެއްވުންތަކުގައި މި ސަރުކާރުގެ ތަޢުލީމީ ސިޔާސަތުގެ ދަށުން އެއްވެސް ކުއްޖަކު ބާކީނުކުރުމަށް އެޑިޔުކޭޝަން މިނިސްޓްރީން ކުރައްވަމުންގެންދާ މަސައްކަތްތަކުގެ މަޢުލޫމާތު އެފަރާތްތަކާއި ޙިއްޞާ ކުރައްވާނެއެވެ.
އަދި ސްކޫލުތަކުގައި ކިޔަވައިދިނުމުގެ ފެންވަރު އިތުރުކުރުމާއި ބެހޭ ގޮތުންނާއި ސުކޫލުތަކަށް ދިމާވާ ދަތިތަކާއިބެހޭ މަޢުލޫމާތު އޮޅުންފިލުއްވާ، އެކަންތައްތައް ޙައްލު ކުރެވިދާނެ ގޮތްތަކާބެހޭގޮތުން މަޝްވަރާ ކުރައްވާނެއެވެ.
މީގެ އިތުރުން ދަސްވާރު ޕްރޮގްރާމާއި ބީޓެކް ސްޓްރީމާއި ބެހޭގޮތުން ސުކޫލްތަކުގެ ދަރިވަރުންނާއި ބެލެނިވެރިންނަށް މަޢުލޫމާތު ފޯރުކޮށްދީ، މިނިސްޓްރީގެ ޑިޕާޓްމަންޓްތަކުން ކުރަމުންގެންދާ މަސައްކަތްތަކާއި ގުޅޭ މަޢުލޫމާތު ސްކޫލްތަކުގައި އެ މަސައްކަތްތަކާއި ޙަވާލުވެތިބި މުއައްޒިފުންނަށް ފޯރުކޮށްދޭނެއެވެ.
އަދި މިނިސްޓްރީ އާއި އެމްއެންޑީއެފް ގުޅިގެން ސްކޫލްތަކުގައި ކުރިއަށްގެންދާ ތަރުބަވީ ޖީލު ބިނާކުރުމުގެ ޕްރޮގްރާމް ސްކޫލްތަކުގެ ދަރިވަރުންނަށާއި ބެލެނިވެރިންނަށް ކުރިއަށް ގެންދެއްވުމަށް ހަމަޖެހިފައިވެއެވެ.
މިނިސްޓަރގެ މި ދަތުރުފުޅުގައި އެކަމަނާގެ އަރިހުގައި އެޑިޔުކޭޝަން މިނިސްޓްރީގެ ބައެއް އިސްވެރިން ބައިވެރިވެވަޑައިގަންނަވައެވެ.